Kategoritë që përfitojnë nga skema e rimbursimit

Në skemë, edhe familjet që marrin ndihmë ekonomike

Krahas pensionistëve, në skemën e rimbursimit të dritave janë edhe familjet që trajtohen me ndihmë ekonomike dhe ato që kanë në përbërje anëtarë me aftësi të kufizuar, të lindur ose të bërë të tillë, të cilët deklarohen të paaftë për punë me vendim të KMCAP- it, si edhe kryefamiljarët që përfitojnë pension invaliditeti shtetëror dhe pension invaliditeti të plotë në fshat dhe nuk kanë anëtarë të familjes të punësuar ose të vetëpunësuar. Në vendimin e miratuar në 2014 "Për mbrojtjen e shtresave në nevojë për efekt të heqjes së fashës deri në 300 KW/ H në muaj", të drejtën për t'u kompensuar me 648 lekë në muaj e kanë edhe familjet e punonjësve buxhetorë, me pagë mujore bruto nën 35 mijë lekë në muaj, kur punonjësi është kryefamiljar dhe nuk ka asnjë anëtar të familjes të punësuar ose të vetëpunësuar, të verbrit dhe personat paraplegjikë e tetraplegjikë. Nga të dhënat e Institutit të Sigurimeve Shoqërore mësohet se janë rreth 209 mijë familje në skemën e rimbursimit, pas vendimit të qeverisë për rritjen e çmimit të energjisë elektrike në vitin 2015. Për të përfituar, krahas deklaratës personale, e cila plotësohet nga përfituesi pranë Agjencisë Lokale të Sigurimeve Shoqërore në vendbanimin e tij, kërkohet fotokopje e kontratës së energjisë elektrike nga Operatori i Shpërndarjes së Energjisë Elektrike, si dhe certifikatë familjare kur ka fëmijë në ngarkim, me kusht që ata të jenë deri në moshën 18 vjeç dhe kur vazhdojnë shkollën deri në 25 vjeç, duke paraqitur vërtetimin e shkollës. Kur ka persona në ngarkim mbi këtë moshë, duhet të paraqitet dhe vërtetim nga Zyrat e Punësimit, nga Zyra Tatimore e Bashkisë dhe Qendrës Administrative dhe nga Zyra e Tatim- Taksave.