Urrejtje për pushuesit kosovarë, në kërkim 2 persona
Shkodrani dhe lezhjani, në kërkim për nxitje të urrejtjes
Policia njoftoi dje se ka shpallur në kërkim dy persona, pasi dy ditë më parë me anë të dy videove, ofendojnë, duke folur me gjuhën e urrejtjes për pushuesit kosovarë mysliman. Duke iu referuar njoftimit, Policia u vu në lëvizje pas publikimit të videove në një portal të Kosovës. "Nisur nga disa publikime në datën 12.08.2019 në media elektronike dhe konkretisht në portalin ' Insajderi' ku shkruhet se: ' Dy radikal fetar katolik nga Shqipëria, përmes disa videove të cilat kanë ardhur në redaksinë e Gazetës ' Insajderi', dëgjohen duke ofenduar myslimanët nga Kosova dhe Maqedonia, të cilët shkojnë për pushime në bregdetin shqiptar', ju informojmë se: Policia e Shtetit ka nisur menjëherë verifikimet përkatëse për të vënë para përgjegjësisë ligjore këta komentues, të cilët me komentet e tyre nxisin urrejtjen dhe grindjet. Nga tërësia e veprimeve procedurale të kryera janë identifikuar dy personat që kanë folur me gjuhën e urrejtjes, të cilët janë: A. Z, 39 vjeç, banues në Hot, Malësi e Madhe dhe L. M, 36 vjeç, banues në Kallmet Lezhë", njoftoi Policia.
NË KËRKIM
Pas identifikimit, Policia ka bërë kërkimet për të bërë të mundur ekzekutimit të vendimit për shtetasit e lartpërmendur, por ata kanë rezultuar se janë jashtë vendit. "Të dy këta persona janë shpallur në kërkim policor, pasi nga verifikimet kanë rezultuar të jenë jashtë territorit të Republikës së Shqipërisë", shkruhet në njoftim. Materialet procedurale hetimore në ngarkim të shtetasve të shpallur në kërkim policor i janë referuar Prokurorisë së Rrethit Gjyqësor Shkodër dhe Lezhë për veprën penale të "Nxitjes së urrejtjes ose grindjeve" parashikuar nga neni 265 i Kodit Penal të Republikës së Shqipërisë dhe po punohet për identifikimin e personave të tjerë të implikuar në këtë aktivitet.
SHKRIMI
Gazeta "Insajder" shkruante dy ditë më parë se dy radikal fetar katolik nga Shqipëria, përmes disa videove të cilat kanë ardhur në redaksinë e gazetës, dëgjohen duke ofenduar myslimanët nga Kosova dhe Maqedonia të cilët shkojnë për pushime në bregdetin shqiptarë. Ofendimet ndaj kosovarëve dhe maqedonasve janë nga më të rëndat, duke sharë e deri tek ofendimetë tilla, që nëse shohin ndonjë mysliman nga Kosova dhe Maqedonia, do t'i rrjepin sikur serbët.