U shpall në kërkim, vetëdorëzohet në Polici numri dy i PS- së në Durrës
DURRES - Arben Isaku, numri dy i Partisë Socialiste në Durrës dhe njëkohësisht nëndrejtori i Kadastrës, është vetëdorëzuar në Komisariatin e Policisë Durrës, tri ditë pas shpalljes në kërkim për korrupsion dhe shpërdorim detyre. Isaku, i cili aktualisht mban detyrën e zv. drejtorit të Agjencisë Shtetërore të Kadastrës në Durrës dhe atë të kryetarit të këshilltarëve të PS- së në Bashkinë Durrës, si edhe sekretar i përgjithshëm i degës së PS- së në qytetin bregdetar, ka trokitur vetë në Polici duke u vënë në dispozicion të hetimeve. Ai u shpall në kërkim të shtunën, me akuzën e korrupsionit dhe shpërdorimit të detyrës. Bashkë me të u vetëdorezua dhe specialisti i Kadastrës. Nga hetimet, ku Isaku u mbajt në përgjim, rezulton se ka pajisur me legalizim dy persona që kanë paraqitur dokumente të falsifikuara për pronësinë e një sipërfaqeje rreth 600 metra katrorë në zonën e Plazhit në Durrës. Në hetim janë dhe dy përfituesit për akuzën vjedhje me pasoja të rënda. Bëhet fjalë për dy truaj në zonën e plazhit në Durrës, përkatësisht 123 metra katrorë dhe 500 metra katrorë, që janë përfituar nga dy të rinj, një nga Durrësi dhe tjetri nga Berati, në dëm të pronarit të vërtetë të tokës, të cilët janë ende në kërkim nga Policia. Gjatë operacionit është arrestuar edhe një prej ekonomistëve të Kadastrës. Tre zyrtarët ishin mbajtur në vëzhgim dhe në përgjim telefonik e ambiental nga ana e specialistëve të Krimit Ekonomik pranë Drejtorisë Vendore të Policisë Durrës, për disa muaj me radhë. “Personat më lart kanë pajisur me leje legalizimi duke falsifikuar dokumentet, shtetasit Xh. N., 29 vjeç, banues në Durrës dhe E. S., 39 vjeç, banues në Berat, të cilët janë shpallur në kërkim dhe po punohet për kapjen e tyre, pasi Prokuroria e Rrethit Gjyqësor Durrës ka nxjerrë urdhërndalim për veprën penale ‘ Vjedhja me pasoja të rënda’”, bëhet e ditur nga Policia. Nga fundi i vitit 2017 deri në shkrirjen e ALUZINIt me Kadastrën, Isaku mori postin e zv. drejtorit të Kadastrës. Arben Isaku, gjatë kohës që Vangjush Dako ishte në qendër të sulmeve mbi përfshirjen e tij në hetimet e dosjes “339”, ishte një nga mbrojtësit më të mëdhenj të ish- kryebashkiakut. Ndërkohë, vetëm pak ditë më parë, babai i dy fëmijëve të mitur ka publikuar në rrjetin e tij social në “Facebook” një thënie në anglisht, që shqipërohet: “Thuaj të vërtetën, edhe nëse zëri juaj dridhet”. l. m