Pesë shtetet e fuqishme: Kosova duhet të heqë taksën

Ambasada e Shteteve të Bashkuara të Amerikës, ajo e Francës, Gjermanisë, Italisë dhe Mbretërisë së Bashkuar, në një deklaratë të përbashkët kanë kërkuar nga Kosova heqjen e menjëhershme të taksës ndaj produkteve serbe dhe fillimin e dialogut me Serbinë. Në deklaratën e përcjellë përmes ambasadës amerikane në Kosovë, theksohet se qeveritë e pesë vendeve të fuqishme janë të bashkuara me qëllimin për të parë normalizimin e plotë ndërmjet Kosovës dhe Serbisë, përmes një marrëveshjeje gjithëpërfshirëse që i kontribuon stabilitetit rajonal. Po ashtu, theksohet se ‘ status quo’- ja pengon përparimin e Kosovës dhe Serbisë në rrugën drejt Bashkimit Europian dhe nuk është e qëndrueshme. “Pas viteve të tëra të ngecjes, ka ardhur koha që më në fund të mbyllen konfliktet e viteve ‘ 90 dhe të ofrohet një e ardhme e sigurt dhe e begatshme për qytetarët e Kosovës dhe të Serbisë, duke negociuar në mirëbesim një marrëveshje që mund ta mbështesin të dyja palët. Prandaj, i bëjmë thirrje Kosovës dhe Serbisë që menjëherë të rifillojnë dialogun e udhëhequr nga BE- ja dhe kërkojmë nga të dyja palët të shmangin veprime që do të pengonin një marrëveshje përfundimtare, e cila është e nevojshme për të dy vendet për të arritur integrim më të madh euroatlantik dhe përfitimet përcjellëse”, thuhet në komunikatë. Pesë shtetet e fuqishme theksojnë se janë të gatshme të forcojnë rolin e tyre në këtë proces, në përkrahje të përfaqësuesit të lartë të BE- së, por thonë se mund ta bëjnë një gjë të tillë vetëm kur Kosova të japë shenja të gatishmërisë për kompromis, për heqjen e pengesave dhe rifillimin e bisedimeve. “Për Kosovën, kjo nënkupton heqjen e taksave të vendosura ndaj Serbisë. Për Serbinë, kjo nënkupton ndërprerjen e fushatës për heqjen e njohjeve kundër Kosovës”, theksohet në komunikatë. Qeveria e Kosovës iu është përgjigjur menjëherë përfaqësuesve diplomatikë të vendeve të fuqishme. Zyra e Kryeministrit u reagoi shteteve të QUINTit ( Francës, Gjermanisë, Mbretërisë së Bashkuar, Italisë dhe Shteteve të Bashkuara të Amerikës), se taksa është vendim i drejtë dhe dialogun nuk e ka ndërprerë pala kosovare. “Qeveria e Republikës së Kosovës, konkretisht Kryeministri Haradinaj, gjithmonë ka punuar dhe ka qenë i qartë në të drejtën e Kosovës për ta mbrojtur integritetin dhe sovranitetin e vendit. Kësisoj, vendimi për vendosjen e taksës ndaj produkteve të Serbisë dhe BHsë ka qenë veprim i nevojshëm në shërbim të mbrojtjes së interesave të Kosovës, nga veprimet armiqësore dhe kërcënimet e vazhdueshme të Serbisë kundër shtetit dhe institucioneve të Kosovës... këtë qëndrim vazhdojmë ta kemi... Sa i përket dialogut, Kosova asnjëherë nuk e ka penguar atë, madje jemi shprehur të gatshëm të ulemi në tavolinë për një marrëveshje finale, ligjërisht të obligueshme, në kufijtë ekzistues dhe që çon në njohje reciproke. Ky proces nuk duhet të jetë i kushtëzuar”, thuhet më tutje në reagim, sipas “Express”.