Verifikimi, PD kërkon informacione nga Prokuroria "Reagimi s'ka ardhur ende, po zhbën qëllimin e dekriminalizimit"
"Valdrin Pjetri, i dënuar me vendim të formës së prerë"
Partia Demokratike i ka dërguar Prokurorisë të dhënat konkrete që ajo publikoi një ditë më parë për Valdrin Pjetrin në Itali, i cili sipas saj rezulton i dënuar për trafik droge. Në një letër të sekretarit të përgjithshëm, Gazment Bardhi, vihet në dukje se 13 ditë pas kërkesës së PD- së për verifikimin e Pjetrit sipas ligjit të dekriminalizimit, nga Prokuroria nuk ka patur një reagim institucional të shpejtë. "Për fat të keq, ky reagim nuk ka ardhur ende, duke zhbërë qëllimin primar që ka ligji i dekriminalizimit.", thuhet në komunikimin e sekretarit të përgjithshëm të PD me Prokurorinë e Përgjithshme, duke i vënë në dispozicion informacionin që posedon për Valdrin Pjetrin. "Sipas këtyre të dhënave, rezulton se Valdrin Pjetri është i dënuar nga Gjykata e Firences, me vendimin e formës së prerë të datës 12 qershor 2003, me 18 muaj burg dhe 1000 Euro gjobë, për veprën penale ' shpërndarje, prodhim dhe trafikim i lëndëve narkotike dhe lëndëve të tjera të paligjshme psikotrope', të kryer në bashkëpunim.", shkruan Bardhi. Për shkak të vonesës gati dyjavore të Prokurorisë, PD- j i kërkon organit të akuzës që ta informojë atë dhe opinionin publik mbi procedurat e verifikimit që ka nisur dhe rezultatet e deritanishme të këtij verifikimi. "Nisur nga interesi i lartë publik që parqet kjo çështje, Partia Demokratike e Shqipërisë ka pritur një verifikim dhe reagim institucional të shpejtë nga ana e Prokurorisë së Përgjithshme. Për fat të keq, ky reagim nuk ka ardhur ende, duke zhbërë qëllimin primar që ka ligji i dekriminalizimt. Konkretisht, qëllimi i ligjit është të garantojë besimin e publikut në funksionimin e organeve të zgjedhura shtetërore, nëpërmjet pengimit të zgjedhjes ose emërimit në të, të personave, të cilët janë dënuar për kryerjen e krimeve. Kjo masë ligjore aplikohet në funksion të mbrojtjes dhe garantimit të mirëfunksionimit demokratik të organeve të qeverisjes vendore, nga ndikimi apo pjesëmarrja në politikbërje dhe/ ose vendimmarrje të personave të cilat janë dënuar sipas ligjit. Organi i Prokurorisë ka të gjitha instrumentet ligjore dhe institucionale për të kryer një verifikim të shpejtë dhe pa asnjë vonesë, nëse ka vullnet për të zbatuar ligjin. Është me rëndësi themelore për shtetin e së drejtës që ligji të arrijë qëllimin e tij përpara se të ketë prodhuar pasojat që synon të shmangë", thuhet në letrën e sekretarit të përgjithshëm të PD- së.