Kriminaliteti, Lleshaj takim me drejtuesit e Policisë
Ministri caktoi detyra për drejtuesit për parandalimin e ngjarjeve
Vrasjet e ndodhura në ditët e fundit dhe gjendja e kriminalitetit detyruan ministrin e Brendshëm, Sandër Lleshaj, që të zhvillojë një takim me drejtuesit kryesorë të Policisë së Shtetit të nivelit qendror dhe vendor, të cilët raportuan për gjendjen e sigurisë dhe të rendit publik në vend.
Gjatë takimit, ministri i Brendshëm u ndal te nevoja e intensifikimit të punës së drejtuesve dhe strukturave të Policisë së Shtetit kundër veprimtarisë së rëndë kriminale në vend. Më tej, ministri Lleshaj kërkoi rritjen e përpjekjeve parandaluese kundër personave me rekorde kriminale dhe rrezikshmëri të lartë, të cilët përpiqen të shfrytëzojnë këtë periudhë për qëllime kriminale. Gjatë takimit nuk munguan edhe kritikat për disa nga drejtuesit vendorë për ngjarje kriminale të ndodhura gjatë muajit gusht. Lleshaj përcaktoi detyra, të cilat duhet të ndiqen në periudhën në vijim. "' Presingu' i mirëfilltë ndaj personave me profil kriminal, përfshirë edhe ata që kthehen në vend gjatë pushimeve, mbikëqyrja parandaluese ndaj tyre, kontrollet e mjediseve të frekuentuara prej tyre, e automjeteve dhe e veprimeve u përcaktuan si detyrë e dorës së parë", njoftoi dje Ministria e Brendshme. Po ashtu, u kërkua shtimi i kontrolleve për armëmbajtjen pa leje në mjedise publike, si në qarkullimin rrugor, bare e diskoteka. Detyrat e caktuara nga ministri nuk ishin të drejtuara vetëm në parandalimin e krimeve, por ai kërkoi angazhim edhe për menaxhimin efektiv të qarkullimit rrugor, në kushtet e rëndimit të tij për shkak të flukseve të mëdha dhe të sjelljes së papërshtatshme të disa qytetarëve. Edhe për parandalimin e kultivimit të kanabisit, Lleshaj kërkoi të ketë më shumë vigjilencë. "Lleshaj vuri theks të veçantë në masat kundër kultivimit dhe trafikimit të bimëve narkotike, ku evidentoi nevojën për vigjilencë të pandërprerë në këtë fushë. Të njëjtën vigjilencë kërkoi edhe në mbrojtjen nga zjarret në vend, në kushtet e thatësirës dhe temperaturave të larta, duke përcaktuar detyra për të gjitha strukturat e PSH", njoftoi Ministria. Gjatë takimit u pranua se Policia ka kapacitete të limituara njerëzore, teknike dhe financiare dhe për këtë, e vetmja rrugë e arsyeshme për sukses është bashkëpunimi me publikun. "Në këtë drejtim u kërkua përmirësim i komunikimit, tërheqje efektive e informacionit dhe reagim i shpejtë ndaj tij. Mbetet sfidë e rëndësishme e PSH gjetja e rrugëve për rritjen e pjesëmarrjes së publikut në shërbim të sigurisë. Kushdo është i ftuar të ndajë me Policinë çdo informacion për persona të botës së krimit, ngjarje kriminale, kundërvajtje të ndryshme penale, armëmbajtje pa leje, shkelje të rregullave të qarkullimit, zjarreve", shkruhet në njoftim.