Kapet me 3 armë zjarri, arrestohet 47- vjeçari nga Peza
Policia e Tiranës arrestoi dje një 47- vjeçar për armëmbajtje pa leje. Duke iu referuar njoftimit të Policisë, shtetasit D. H. iu gjetën 3 armë zjarri, 1 në banesë dhe dy pranë saj. Operacioni është zhvilluar nga Komisariati Numër 6, pas disa të dhënave që kishin denoncuar qytetarë të ndryshëm. 47- vjeçari u arrestua gjatë ditës së djeshme dhe do të hetohet në vazhdim nga Prokuroria e Tiranës. Gjatë operacionit të Policisë janë sekuestruar edhe disa fishekë luftarakë. "Finalizohet një tjetër operacion në fushën e armëmbajtjes pa leje. Falë bashkëpunimit me qytetarët u zhvillua dhe finalizua operacioni i koduar ' PEZA', ku u sekuestruan 3 armë zjarri dhe 308 fishekë luftarakë. Në pranga 47- vjeçari që posedonte armët e municionin luftarak", njoftoi dje Policia.
OPERACIONI Duke iu referuar njoftimit të Policisë, kanë qenë disa informacione të dhëna nga qytetarët që kanë zbuluar se 47- vjeçari kishte në posedim armë. Ky i fundit është arrestuar në banesën e tij, ku edhe është sekuestruar një nga armët. "Në zbatim të planit të masave për evidentimin dhe kapjen e personave me tendencë armëmbajtjeje pa leje, falë edhe informacioneve të marra nga qytetarët se një shtetas posedonte disa armë zjarri, shërbimet e Seksionit të Policisë Kriminale të Komisariatit të Policisë Nr. 6 , organizuan dhe zhvilluan operacionin policor të koduar ' Peza', i cili u finalizua me kapjen në flagrancë të shtetasit: D. H., 47 vjeç, banues në Ballashenj, Njësia Administrative Pezë", njoftoi dje Policia. Gjatë kontrollit në banesën e këtij shtetasi, sipas Policisë, u gjetën dhe sekuestruan në cilësinë e provës materiale 1 armë zjarri pistoletë me 8 fishekë. Po në vijim të kontrollit, në afërsi të banesës së këtij shtetasi, shërbimet e Policisë gjetën dhe sekuestruan edhe dy armë zjarri të tjera, konkretisht një automatik kallashnikov, një pushkë dhe 300 fishekë luftarakë. "Vijon puna në bashkëpunim me Prokurorinë e Rrethit Gjyqësor Tiranë, me qëllim dokumentimin e plotë ligjor të veprimtarisë kriminale të shtetasit D. H.", shkruhet në njoftimin e Policisë. Dy ditë më parë, Policia e Shtetit njoftoi ndalimin e një shtetasi kosovar me disa armë zjarri dhe lëndë plasëse, ndërsa operacionet për arrestimin e personave që posedojnë armë pa leje, sipas Policisë vazhdojnë dhe rastet nuk janë të pakta.