Festa e orëve të vona, Policia merr masa të shtuara për sigurinë

KORÇE - Policia e Shtetit dhe Policia Bashkiake në Korçë kanë marrë masa për mbarëvajtjen e 5 netëve të Festës së Birrës. Për garantimin e rendit dhe sigurisë publike, janë në gatishmëri qindra forca policie. Janë marrë masa për bllokimin e lëvizjes së automjeteve nga vendi i quajtur "Lëndina e Lotëve", Pallati i Sportit, Qendra e Trajtimit të Studentëve, Unazës së Stadiumit si dhe në rrugën "Niko Kovaçi" ( rruga e Dritave të Verdha e cila do të qëndrojë e bllokuar) me punonjës të Policisë rrugore dhe me mjete mekanike bllokimi e sinjalizimi. Në bashkëpunim me Policinë Bashkiake do të lejohet hyrja në unazën lindore dhe veriore të stadiumit, ku vendi i parkimit të këtyre automjeteve do të jetë në pjesën veriore të kësaj unaze. Në dy bulevardet kryesore "Republika" dhe "Gjergj Kastrioti", në sheshet ku do të ketë përqendrim dhe qarkullim të madh njerëzish dhe mjetesh, do të ketë shërbime të shtuara të punonjësve të Policisë, të cilët do të mbikëqyrin ruajtjen e rendit, do të ndërhyjnë në zgjidhjen e problemeve dhe do të parandalojnë krijimin e situatave të ndryshme të cilat mund të cenojnë sigurinë publike. Gjithashtu, shërbimet e rendit do të mbajnë kontakt të vazhdueshëm me drejtuesit e objekteve me rëndësi të veçantë si: Nënstacionet Elektrike, Ujësjellësi etj., për të forcuar masat e ruajtjes së tyre. Ndërsa Policia Rrugore do të jetë në gatishmëri të plotë për të orientuar lëvizjen e mjeteve para, gjatë zhvillimit dhe deri në përfundim të këtij eventi, do të disiplinojnë trafikun me qëllim parandalimin e ngjarjeve të mundshme rrugore.