“Pushtimi” i aeroportit në Hong Kong, Kina e krahason me terrorizmin
Pas paralajmërimit se do të ndërhyjë nëse qeveria në Hong Kong nuk ia del dot me protestuesit, Kina i ka dënuar përleshjet e dhunshme si “sjellje që janë afër terrorizmit”. Ekspertët besojnë se rritja e retorikës së Kinës po paralajmëron një ndërhyrje të afërt për shtypjen e protestave në Hong Kong. Pas disa ditësh me protesta paqësore në aeroportin ndërkombëtar të Hong Kongut, të martën në mbrëmje kanë nisur përleshjet mes protestuesve dhe policisë. Pamjet me video tregonin një oficer duke drejtuar armën e tij ndaj protestuesve, që e rrahën me shkopin e tij të gomës. Kjo është hera e dytë brenda një jave që zyrtarët kinezë i kanë krahasuar protestat në Hong Kong me aktivitete terroriste. Disa vëzhgues besojnë se përdorimi i një gjuhe të tillë ka të ngjarë të rrisë mundësinë e ndërhyrjes nga Pekini. Zyrtarë në SHBA thanë se ishin “thellësisht të shqetësuar nga raportet e lëvizjes paramilitare kineze përgjatë kufirit të Hong Kongut” dhe i kërkuan Kinës të respektojë shkallën e lartë të autonomisë së Hong Kongut. Hong Kongu, ish- koloni britanike, ka një status të veçantë me sistemin e vet juridik dhe gjyqësor dhe të drejtat dhe liritë përtej atyre në territorin e Kinës. Megjithatë, shumë aktivistë besojnë se deklaratat e Kinës përbëjnë kërcënim. Miliona qytetarë të Hong Kongut kanë marrë pjesë në 10 javë protesta antiqeveritare, duke kërkuar reforma demokratike dhe hetime për “egërsinë” e policisë. Protesta e fundit, një “pushtim” i aeroportit, shkaktoi anulimin e qindra fluturimeve pasi protestuesit përshkallëzuan veprimet e tyre. Të martën, protestuesit bllokuan udhëtarët që të hynin në fluturime, duke përdorur karroca bagazhesh për të ndërtuar barriera. Disa protestues mbanin shenja duke u kërkuar falje udhëtarëve për bezdisjen e shkaktuar nga demonstratat e tyre.