LISTA E PERFITUESVE
Të përndjekurit, afati i ri për trashëgimtarët
Ministria e Financave publikon listën e 350 trashëgimtarëve të ish- të përndjekurve, që marrin këstin e tretë të dëmshpërblimit. Dokumentet që duhet të plotësojnë
Në fund të muajit shtator skadon afati për dorëzimin e dokumenteve nga ana e 350 trashëgimtarëve, që janë në radhë për këstin e tretë të dëmshpërblimit.
Ligji përcakton një afat tremujor, por nëse brenda kësaj periudhe nuk bëhen plotësimet e nevojshme, atëherë familjarët e të dënuarve njoftohen se kanë edhe 30 ditë të tjera shtesë për të dorëzuar dokumentet. Për trashëgimtarët që kanë emrin në listë, kanë mbetur edhe 2 javë të tjera kohë për të përmbyllur këtë proces. "Brenda një afati 3- mujor nga data e publikimit të listës, të gjithë ish- të përndjekurit, të cilët janë pjesë e saj, duhet të dorëzojnë në strukturën përgjegjëse të Ministrisë së Financave dokumentet e parashikuara në aktet nënligjore, që janë nxjerrë në zbatim të ligjit. Kur një ish- i dënuar politik ose trashëgimtari/ trashëgimtarët e ish- të dënuarit politik nuk dorëzon dokumentacionin e kërkuar brenda afatit të parashikuar në paragrafin e mësipërm, ai/ ajo njoftohet lidhur me përfundimin e këtij afati dhe i jepet një afat shtesë deri në 30 ditë. Në rast se dokumentacioni i kërkuar nuk dorëzohet edhe pas kalimit të afatit, pagesa u kalon personave që nuk bëjnë pjesë në kategorinë e subjekteve përfituese parësore, të cilat, në përputhje me ligjin, kanë dorëzuar dokumentet e duhura dhe janë të gatshme për pagesë", thuhet në nenin 14 të ligjit të ndryshuar.
DOKUMENTET Përveç kopjes së kartës së identitetit dhe numrit të llogarisë bankare që duhet të jetë aktiv, për të përfituar këstin e tretë të dëmshpërblimit, trashëgimtarët duhet të dorëzojnë edhe certifikatë vdekjeje, certifikatë të trungut familjar, dëshmi trashëgimie dhe prokurë. Sipas ligjit, personat, të cilët nuk dëmshpërblehen për shkak të mosplotësimit të dokumenteve, gëzojnë të drejtën për të marrë këstin e kësaj pagese në fazën tjetër, por jo më vonë se tre vjet pas publikimit të emrit për herë të parë në faqen zyrtare. "Me kalimin e kësaj periudhe, personi që nuk ka plotësuar dokumentacionin e kërkuar sipas përcaktimeve të bëra në këtë nen, humbet të drejtën e dëmshpërblimit", specifikohet në ligj.
DOSJET Në harkun e më pak se një viti nga firmosja e urdhrit për çeljen e këstit të tretë të dëmshpërblimit, janë marrë në shqyrtim nga Ministria e Financave më shumë se 3400 dosje, kryesisht me vendime 2008, 2009 dhe 2010. Për një pjesë prej tyre është bërë edhe ndarja e dëmshpërblimit, ndërkohë vijon procesi për dosjet e mbetura. Për shkak të pamjaftueshmërisë së fondit, një pjesë e pagesave me gjasë do të kryhen në fillim të vitit që vjen.