Gjata: Rama pengon hetimin pasuror të Pjetrit
PD dorëzon sot informacionet te Krimet e Rënda
Partia Demokratike denoncoi dje zyrtarisht Valdrin Pjetrin. Këtë herë jo për të kaluarën e tij, por për pasurinë që zotëron. Sekretari për Çështjet Ligjore në PD, Çlirim Gjata, theksoi se Valdrin Pjetri është subjekt i ligjit antimafia pasi ka prova që ai është dënuar për trafik droge dhe zotëron në pronësi një hotel në periferi të Tiranës. "Edi Rama i mashtroi shqiptarët pak ditë më parë, kur, pasi Partia Demokratike publikoi dokumentet e dënimit për trafik droge të Valdrin Pjetrit, tha se nuk do ta toleronte atë. Edi Rama bën gjithmonë të kundërtën e asaj që thotë. Edi Rama, i cili vazhdon t'i japë mbrojtje të besuarit të tij për Shkodrën, ka detyrimin ligjor dhe moral t'u thotë shqiptarëve: Pse nuk vepron ligji Antimafia ndaj pasurive të drogës së Valdrin Pjetrit? Përgjigjet e kësaj pyetjeje lidhet drejtpërsëdrejti me planin e Edi Ramës për të përdorur trafikantin e drogës derisa, në mënyrë të paligjshme, të marrë drejtimin e Bashkisë së Shkodrës. Është ky skenar pse trafikanti i drogës, Valdrin Pjetri, ndalohet të japë dorëheqjen para betimit, pse Prokuroria po e zvarrit verifikimin, pse ligji antimafia nuk vepron", theksoi Gjata, duke ilustruar në monitorin e PD- së pamjen- video të hotelit të Pjetrit, i cili është inauguruar nga Milva Ekonomi në kohën kur kjo e fundit ka qenë ministre për Ekonominë. "Pamjet në video tregojnë se pasuria më e dukshme e Valdrin Pjetrit, është një hotel superluksoz në periferi të Tiranës, i inauguruar me praninë e ministres së Edi Ramës. Sipas ligjit Antimafia, Valdrin Pjetri është subjekt i drejtpërdrejtë i tij, pasi siç edhe ligji shprehet, subjekt i ligjit është çdo person për të cilin ka indicie se ka kryer krime që lidhen me trafikimin e lëndëve narkotike". Në vijim të deklaratës, Gjata akuzoi Kryeministrin Rama se ka kapur institucionin e akuzës dhe për këtë, PD do të informojë vetë Prokurorinë e Krimeve të rënda, e cila sipas saj, ka detyrimin ligjor të nisë menjëherë hetimet ndaj Pjetrit. "Për rastin e Valdrin Pjetrit, jo vetëm që ka indicie për kryerjen e këtyre krimeve, por ky fakt është i provuar nga vendimet e Drejtësisë italiane, të cilat janë publikuar prej disa ditësh nga Partia Demokratike. Valdrin Pjetri është dënuar me burg për trafik droge, por as Policia, dhe as Prokuroria nuk kanë bërë asnjë lëvizje për të zbatuar ligjin. E vetmja forcë që mund t'i ndalojë ata, është ajo e Kryeministrit të vendit, i cili ndryshe flet dhe ndryshe vepron, duke garantuar paprekshmëri për kriminelët dhe trafikantët e tij. Meqenëse Prokuroria e kapur dhe kontrolluar nga Edi Rama bën sikur nuk dëgjon dhe nuk sheh, njëlloj siç nuk sheh e dëgjon korrupsionin galopant të Qeverisë së Edi Ramës, Partia Demokratike do të informojë zyrtarisht nesër Prokurorinë e Krimeve të Rënda, e cila ka detyrimin të nisë menjëherë hetim pasuror ndaj Valdrin Pjetrit dhe familjes së tij, për shkak se ai është subjekt i ligjit Antimafia", u shpreh Gjata.