Duka: Zgjidhja, vetëm me marrëveshje politike
"Në 13 tetor nuk ka zgjedhje, u regjistruam në respekt të dekretit"
Aleati i Partisë Demokratike, Agron Duka, nuk beson se në 13 tetor do të zhvillohen zgjedhje të reja vendore. Në një intervistë për "ABC News", kreu i Partisë Agrare Ambientaliste thotë se situata me kandidatin e Shkodrës e thellon krizën, duke sjellë nevojën për një marrëveshje të gjerë politike. Por Duka është kategorik kur shprehet se pakte si ai i 2017- ës mes Ramës e Bashës, politika shqiptare nuk duhet t'i përsërisë më. "Larg qoftë. Vetëm ajo jo. Marrëveshja e 2017- ës tregoi që nuk zgjidhi asgjë. Përkundrazi, e ricikloi krizën. Nëse bëhen marrëveshje të tilla për të ricikluar kriza në leverdi të individëve të veçantë, kjo është në dëm të Shqipërisë. Duhen marrëveshje që të kenë një zgjidhje të qëndrueshme", tha Duka. Sipas tij, në kampin opozitar nuk ka qëndrime të ndryshme lidhur me regjistrimin në KQZ, duke sqaruar se regjistrimi ishte edhe një detyrim për kryebashkiakët opozitarë, që nuk morën pjesë në zgjedhje. "Ne, në respekt të dekretit të Presidentit, disa nga partitë opozitare u regjistruan për zgjedhjet e 13 tetorit. Ju thoni sa shanse ka? Zero shanse ka që të bëhen zgjedhje. Pyetja që bëhet është: Pse disa nga partitë u regjistruan dhe parti të tjera jo? Mendoj që ne thjesht shprehëm respektin për dekretin e Presidentit", tha Duka. Hetimi për pastërtinë e figurës për rastin e kandidatit socialist të Shkodrës, Valdrin Pjetri, dhe mundësia për shkarkimin e tij për Dukën pritet ta thellojnë akoma më shumë krizën. Aleati i Bashës është i bindur se Ilir Meta nuk do ta rrëzojë veten dhe s'do dekretojë një datë të re.
"Situata që po kalojmë është e pakuptimtë. Ju bëni pyetje se çfarë do të bëjmë me Shkodrën. Nuk ka matematicien që ta gjejë se ça do të bëhet. Maxhoranca thotë njoh 30 qershorin, opozita thotë njoh 13 tetorin. 13 tetori i kaloi të gjitha afatet kushtetuese. Nuk bëhet më që të ribëhen zgjedhjet në Shkodër nëse ky zotëria penalizohet me ligjin e dekriminalizimit. Duhet dekreti i Presidentit. Presidenti ka dhënë dekretin me 13 dhe nuk jep datë tjetër. Ça do bëhet? E zgjidh Gjykata Kushtetuese. Gjykatë Kushtetuese nuk ka. Gjithë kjo situatë e pakuptimtë kërkon t'i thërrasim arsyes që të gjithë", tha Duka.