Paketa “Antishpifje”, Meta: Pa lirinë e fjalës, e pamundur rruga drejt BE
"Kundër çdo tentative që synon të cenojë fjalën e lirë dhe pavarësinë e medias, që rrezikon të kthejë vendin 30 vite pas"
Paketa “Antshpifje” e qeverisë ka tërhequr ditën e djeshme vëmendjen e Presidentit Meta, ku theksoi se cenimi i lirisë së shprehjes është cenim i demokracisë.
Nëpërmjet një reagimi zyrtar, institucioni i Presidencës theksoi se Meta po i ndjek me vëmendje shqetësimet e ngritura nga komuniteti i medias mbi këtë nismë të qeverisë, duke shtuar se angazhimi i institucioneve dhe i shoqërisë në përkrahje të lirisë së të shprehurit është tregues për demokracinë, qeverisjen e mirë dhe përgjegjësinë publike në vend. "Presidenti i Republikës, Ilir Meta, po ndjek me shumë vëmendje shqetësimet e thella të shprehura nga komuniteti i gazetarëve shqiptarë dhe organizatat ndërkombëtare që monitorojnë lirinë e medias në vendin tonë, lidhur me nismën ligjore "antishpifje" të propozuar nga qeveria. Duke ndarë bindjen se çdo goditje ndaj institucionit të medias, është sulm ndaj demokracisë, Presidenti Meta thekson domosdoshmërinë e marrjes në shqyrtim nga ana e qeverisë, por edhe e Parlamentit, e të gjitha sugjerimeve të shprehura nga komuniteti i gazetarëve, me kujdesin dhe vëmendjen e duhur që ato meritojnë. Presidenti Meta shpreh bindjen se angazhimi i institucioneve dhe i shoqërisë në përkrahje të lirisë së të shprehurit, është tregues për demokracinë, qeverisjen e mirë dhe përgjegjësinë publike në vend. Presidenti Meta thekson se liria e të shprehurit është e drejtë themelore e njeriut dhe shtyllë e pazëvendësueshme e jetike për një shoqëri moderne demokratike, si dhe për garantimin e llogaridhënies nga të gjitha institucionet publike", theksohej në komunikatën e Presidencës. Krahas kësaj, aty listoheshin disa të dhëna mbi lirinë e shprehjes në Shqipëri, të nxjerra nga organizatat botërore, që për kreun e shtetit janë një kambanë alarmi mbi gjendjen ku ndodhet gazetaria shqiptare. "Zbritja me 7 vende në Indeksin Botëror të Lirisë së Medias, sipas konkluzioneve të Organizatës Botërore të Gazetarëve ' Reporterët pa Kufij'; përfundimet e raportit vjetor të ' Freedom House' se media në Shqipëri është pjesërisht e lirë; konkluzionet e ' Misionit për lirinë e medias' të shtatë organizatave globale sipas të cilave ' autoritetet shqiptare nuk po përmbushin detyrimet ndaj ligjit vendës dhe instrumenteve ndërkombëtare për të garantuar lirinë e shprehjes dhe të medias, duke theksuar se ka pasur një përkeqësim të sigurisë, kushteve të punës dhe aksesit në informacion të gazetarëve'; raporti paraprak i OSBE/ ODIHR ku theksohej se ' media të mëdha u shërbejnë si platforma lobuese pronarëve të tyre, duke vënë kështu në pikëpyetje pavarësinë e tyre editoriale dhe duke imponuar autocensurën', janë kambana të forta alarmi për gjendjen e përkeqësuar dhe tepër shqetësuese në të cilën ndodhen sot gazetarët në Shqipëri", thuhet në njoftimin zyrtar. Në mbyllje të komunikatës shprehej se pa media të lirë, rruga e Shqipërisë drejt BE- së është e pamundur. "Presidenti Meta garanton komunitetin e gazetarëve se do të jetë përherë në mbështetje të tyre kundër çdo tentative që synon të cenojë fjalën e lirë dhe pavarësinë e medias, që rrezikon të kthejë vendin 30 vite pas. Pa media të lirë dhe të pavarur, rruga e Shqipërisë drejt Bashkimit Europian është e pamundur", nënvizoi Presidenti.