Prej dy muajsh në hetim, lihet në burg kosovari që u kap me 19 pistoleta
Sipas Prokurorisë, ky nuk është rasti parë që 51- vjeçari trafikon armë. Ai i siguronte në Serbi dhe nga Kosova i fuste në Shqipëri
Dy muaj hetime të Prokurorisë për Krime të Rënda kanë zbardhur aktivitetin kriminal të shtetasit kosovar Ylber Ademi, i arrestuar dy ditë më parë në Elbasan me 19 pistoleta dhe 4 kallëpe eksplozivi.
Gjykata për Krime të Rënda caktoi dje masën e sigurisë "Arrest në burg" për 51vjeçarin, i cili nuk foli në seancën për caktim të masës së sigurisë. Ndërkohë, prokurori i çështjes bëri të ditur se Ademi ka qenë në vëzhgim që prej 24 qershorit të këtij viti, kur pasi është kapur me një pistoletë, është lënë i lirë dhe ka qenë nën vëzhgim, pasi dyshohej se aktiviteti kriminal i tij ishte më i gjerë. Pas rezultateve të përgjimit dhe hetimeve të tjera, Prokuroria ka kryer veprime stimuluese, pre e të cilave ka rënë 51- vjeçari, që pasi ka qenë në ndjekje, është ndaluar dhe arrestuar në rrugën nacionale Elbasan- Peqin. Dyshimet janë se 51- vjeçari ka kryer trafik armësh edhe herë të tjera. Ai i siguronte ato në Serbi dhe më pas i shiste në Shqipëri dhe vende të tjera. Por ndërkohë që Ademi dha vetëm gjeneralitetet para Gjykatës, avokati i tij, duke pranuar akuzën e Prokurorisë, i kërkoi Gjykatës që në caktimin e masës të marrë parasysh kushtet dhe rrethanat sociale në të cilat ndodhet i arrestuari, duke caktuar një masë më të butë. Në fund të relatimit të të dyja palëve, gjyqtarja Liljana Baku vendosi të pranojë kërkesën e Prokurorisë dhe të lërë në burg pa afat kosovarin. Ylber Ademi u arrestua tri ditë më parë nga Policia e Shtetit në bashkëpunim me Policinë e Elbasanit, pas një operacioni të drejtuar nga Prokuroria për Krime të Rënda. Ai u ndalua në rrugën Elbasan- Peqin gjatë kohës që ishte duke lëvizur me makinë. "Nën drejtimin e Prokurorisë së Krimeve të Rënda u kryen hetime proaktive, të cilat çuan në finalizimin me sukses të operacionit ' Papër'. Në bashkëpunim me Drejtorinë Vendore të Policisë Elbasan dhe Drejtorinë e Forcës së Posaçme Operacionale në Policinë e Shtetit, në rrugën nacionale Elbasan- Peqin u kap në flagrancë shtetasi: Y. A., 51 vjeç, lindur në Kacandoll dhe banues në Podujevë, Kosovë", njoftoi Policia tri ditë më parë.
SEKUESTRIMI Duke iu referuar burimeve zyrtare, Ylber Ademit i janë sekuestruar në cilësinë e provës materiale gjatë arrestimit 19 armë zjarri të llojit pistoletë, të markave të ndryshme, 400 fishekë luftarakë, 4 kallëpe lënde eksplozive të llojit TNT, me peshë të përgjithshme 1.6 kg, 3 telefona dhe automjeti që transportonte armët. Prokuroria e Krimeve të Rënda bën të ditur se është duke vazhduar hetimet për të bërë të mundur identifikimin e personave që kanë bashkëpunuar me 51vjeçarin, pasi nga veprimet e deritanishme rezulton se ky shtetas ka shitur edhe më parë armë luftarake, në Kosovë, Shqipëri e vende të tjera.