Hysenbelliu: Pse investova te "Birra Korça", më bëri për vete historia e tradita
"Teknologjia e fabrikës është bashkëkohore, e ndërthurur me atë tradicionale. Do ketë një surprizë në shtator"
Irfan Hysenbelliu, president i kompanisë "Hysenbelliu Group", me investimet e kryera në fabrikën e "Birra Korça" e ka kthyer birrën e parë shqiptare në emblemë jo vetëm të Korçës, por të gjithë Shqipërisë.
Hysenbelliu shprehet i kënaqur që Festa e Birrës i sjell Korçës një zhvillim të madh turistik. Presidenti i "Hysenbelliu Group" tregon se, kur vendosi të blinte "Birra Korça", ajo ishte në prag falimenti, por falë investimeve të kryera, e ka kthyer atë në birrën lider në vend. Së fundmi, investime janë kryer edhe në restorantin e fabrikës, duke i rikthyer traditën.
Ka nisur edicioni i festës së "Birra Korça". Çfarë do të thotë kjo për ju?
Për qytetin e Korçës do të thotë një zhvillim akoma edhe më tej. Ju e shikoni që e gjithë Korça është e mbushur me turistë, jo vetëm nga rrethet e Shqipërisë, por nga shumë vende të botës, të cilët kanë ardhur të festojnë së bashku me qytetarët korçarë. Aq shumë kanë ardhur, saqë nuk ka më hotele të lira në Korçë. Kjo i sjell një zhvillim shumë të madh, jo vetëm birrës, por dhe turizmit. Për këtë fakt jam shumë i kënaqur.
"Birra Korça" është emblema e qytetit dhe pas saj qëndron një fabrikë, ku keni investuar shumë. Sa e vështirë ka qenë për ju dhe si ndiheni sot që jeni lider në treg?
Vërtet u bënë 13 vjet që "Birra Korça" i ka kthyer festën qytetit, por mos harroni që është një birrë historike. Është birra e parë shqiptare me traditë. Është një birrë, e cila ka një histori. Unë dikur kam bashkuar 10 biznesmenë te "Birra Tirana". Kam qenë aksioner dhe president i "Birra Tirana". Një nga arsyet pse u shkëputa nga "Birra Tirana" dhe bleva "Birra Korça" është sepse duke lexuar historinë e saj, më bëri për vete. Pashë që po shkonte drejt falimentimit dhe teknologjinë e kishte në amortizim. Bëra rikonstruksion të plotë të saj, duke i kthyer historinë dhe duke i ruajtur traditën. Këtë e kemi bërë me profesionistët që kishte dhe duke trajnuar brezin e ri. Teknologjia është vërtet bashkëkohore, por është e ndërthurur me atë tradicionale. Korça ka një atmosferë të madhe. Restoranti i "Birra Korça" është i mbushur plot me turistë gjatë tre muajve të verës. Restorantit i kemi kthyer traditën. Diskutohej se restoranti kishte mbetur pas dhe nuk ishte investuar dhe pasi i ngritëm emrin birrës, kemi rikthyer edhe restorantin në identitet.
Cili është synimi juaj i radhës?
Ambicia ime e radhës është që kjo traditë të vazhdojë dhe të rritet sa më shumë, njëkohësisht të zgjerojmë kapacitetet e birrës. Ndërkohë kam edhe një ambicie tjetër, që do jetë shumë sekret, të cilën do ta mësoni brenda shtatorit.