Conte akuzon Salvinin për pabesi: Obsesiv ndaj migrimit
Përgjigjet ministri: Paguhem që t’i mbaj italianët të sigurt
Kryeministri italian, Giuseppe Conte, të enjten akuzoi ministrin e Mbrojtjes në qeverinë e tij, Matteo Salvinin, për mungesë besnikërie dhe një fiksim pas bllokimit të imigracionit, që ka ndikuar në intensifikimin e luftës në koalicionin qeverisës.
Conte ka reaguar të enjten si një kundërpërgjigje ndaj përpjekjeve të Salvinit për të përshpejtuar një mocion mosbesimi ndaj qeverisë që ai drejton, me shpresën e ministrit nga ekstremi i djathtë, që të bëhet vetë Kryeministër. Por zgjedhjet e shpejta do të shtynin çështje të rëndësishme në Kuvend, si buxheti i vitit 2020, i cili duhet të votohet në vjeshtë, pasi Italia përpiqet të frenojë borxhin e saj të madh publik, i dyti nga madhësia në bllokun e 19 vendeve të eurozonës, pas Greqisë. Conte, i cili nuk i përket asnjë partie, përmendi rastin e një varke shpëtimi emigrantësh, që Salvini i refuzoi hyrjen në portet e Italisë. Në një lëvizje të papritur, javën e kaluar, Salvini tha se aleanca e tij me Lëvizjen 5 Yjet nga ekstremi i majtë nuk ishte më e zbatueshme, dhe bëri thirrje për zgjedhje të reja, që sipas popullaritetit të tij kohët e fundit, mund t’i lejojnë të bëhet Kryeministër. Por loja me Lëvizjen 5 Yjet nuk i ka shkuar siç e kishte planifikuar. Tani kjo lëvizje dhe Partia Demokratike e krahut të majtë në Itali, po krijojnë një koalicion për të anashkaluar Salvinin. Lëvizja 5 Yjet është dëmtuar nga koalicioni me Legën e Salvinit, me përgjysmim të mbështetësve, që kur të dy partitë bashkuan forcat në qershor të vitit të kaluar. Përkundër tyre, Lega ka fituar një popullaritet të madh, duke u bërë partia më e mbështetur në Itali. Në një letër të hapur për Salvinin, Conte shkruan se ai kishte bindur gjashtë shtete të BE që të merrnin emigrantët në anijen bamirëse “Open Arms”. Ai e akuzoi Salvinin për pabesi, duke keqpërfaqësuar pozicionin e Conte- s si Kryeministër. Conte tha se Salvini kishte për qëllim të shfrytëzonte çështjen e imigracionit për përfitime elektorale dhe jo të kërkonte zgjidhje me partnerët e Italisë. “Unë e kuptoj përqendrimin tënd besnik dhe obsesiv në adresimin e çështjes së imigracionit, duke e zvogëluar atë në formulën e ‘ porteve të mbyllura’. Ti je një udhëheqës politik dhe synon në mënyrë të ligjshme të rrisësh vazhdimisht mbështetjen...”, ka shkruar Conte. Salvini u kundërpërgjigj: “Po, unë jam fajtor që kam një obsesion për sigurinë e qytetarëve italianë dhe një obsesion për të luftuar trafikantët njerëzorë dhe OJQ- të që janë bashkëpunëtorë të trafikantëve njerëzorë. Gjashtëdhjetë milion italianë paguajnë pagën time për këtë obsesion”.