Protesta në Hong Kong, Ushtria kineze bën stërvitje masive në kufi

Hong Kongu të enjten u përgatit për më shumë protesta masive gjatë fundjavës, pasi Kina paralajmëroi përsëri kundër ndërhyrjeve të huaja në krizën e qytetit, në një kohë kur forcat paramilitare të kontinentit zhvilluan stërvitje shumë pranë kufirit. Policë e ushtarë kinezë janë parë duke kryer ushtrime për kontrollin e turmave dhe më shumë se 100 automjete paramilitare me ngjyrë të errët mbushën parkingjet e stadiumit. Dhjetë javë të konfrontimeve gjithnjë e më të dhunshme midis Policisë dhe protestuesve e kanë zhytur Hong Kongun në krizën më të keqe, që kur u kthye nga sundimi britanik në atë kinez në vitin 1997. Sipas “Reuters”, këto protesta përfaqësojnë sfidën më të madhe populiste për Presidentin Kinez, Xi Jinping, qysh kur ai erdhi në pushtet në 2012. Presidenti i SHBA, Donald Trump i lidhi trazirat në Hong Kong me marrëveshjen tregtare SHBA- Kinë dhe sugjeroi se ai ishte i gatshëm të takohej me Presidentin e Kinës, Xi Jinping. “Unë kam ZERO dyshime se nëse Presidenti Xi dëshiron ta zgjidhë shpejt dhe me njerëzisht problemin e Hong Kongut, ai mund ta bëjë këtë. Takim personal?”, ka shkruar Trump në “Twitter”. Departamenti amerikan i Shtetit ka shprehur shqetësim të thellë për raportet që forcat e policisë kineze po mblidheshin afër kufirit me Hong Kongun dhe i kërkuan qeverisë lokale të respektojë lirinë e fjalës. Edhe qeveri të tjera të huaja kërkuan qetësi. Franca u bëri thirrje zyrtarëve të qytetit të rinovojnë bisedimet me aktivistët, ndërsa Kanadaja tha që Kina duhet t’i trajtojë protestat me takt. Protestuesit kanë pesë kërkesa, përfshirë tërheqjen e plotë të një projektligji të pezulluar mbi ekstradimin, e cila do të lejonte që të dyshuarit nga Hong Kongu të dërgoheshin për gjykim në gjykatat e Kinës.