Ndahet nga jeta mjeshtri i gazetarisë Fatos Baxhaku, dedikimet e kolegëve
PËRPARIM KABO: MIK I RRALLË, JETOVE GJATË NË NJË JETË TË SHKURTËR Ja, sot marr vesh qe ike, ike pa kthim. Kur hyja në rrugën tonë të dashur “Sami Frashëri”, sa lija urën e Lanës, atë rrugë me gështenjat e egra në trotuar, gjithnjë të shihja ulur në kafenenë tënde të preferuar. Në fillim, përtej syzeve më hidhje buzëqeshjen, luaje nga vendi dhe me shumë dashuri kurdoherë më thoshe: “Eja ulu, merre një kafe...” Unë qëndroja sipas rastit disa minuta, por edhe brenda tyre me atë zërin tënd të veçantë, të ngrohtë, të pjekur e me një mençuri krejt unikale, shkoqje ide të qarta e më thoshe fjalë të thekura. Më pëlqente kundërthënia jote, arsyetimi alternativ, qasjet e tua krejt befasuese. Kohët e fundit po shihja një dokumentar, më ngrohu. Ishte aq i gjetur, me një tekst aq të bukur, me imazh me përshtyplënie humane. Kur në fund shoh, ishte i yti. Një punë nga ato të thekurat. Po dhe kërkimet në arshiva, botimet, shkrimet, gjithçka qe ishe ti dhe personaliteti yt i dhanë këtij tranzicioni një dimension lirie. Aq mençuri dhe të shprehurin me kurajë. Kjo jetë ne na njohu, vitet na miqësuan, punët shpesh kryqëzuan idetë dhe shtrëngimi i dorës me ty Tosi më jepte shumë gëzim. Te ty dukej se asgjë nuk rrëmbehej, por në fakt çfarë the, çfarë shkrove dhe xhirove në dokumentarë e kaluan kohën, ato vinin nga e ardhmja. E vetmja gjë që nuk doja ishte nxitimi në këtë ditë gushti për të ikur në qiell. Të kam në mendje mik i rrallë. Ti le gjurmë ngado, krijove modelin tënd, jetove gjatë në një jetë të shkurtër. Lamtumirë, më dukesh sikur prej dore vjen në shkollën 8- vjeçare me nënën tënde, mësuesin aq të respektuar të brezave. Eh, jeta...
MENTOR KIKIA: FALEMINDERIT TOS! Shumë kolegë do të donin të të thoshin “faleminderit” Tos, për dorën që u ke dhënë sa herë kanë pasur nevojë. Unë duhet të të them shumë herë, sepse ke qenë mësuesi dhe njeriu që më ke mbështetur në fillimet e mia. Së gjalli nuk i pranoje, pasi modestia jote “mendjemadhe” nuk të lejonte. Ishe jo thjesht një gazetar i mirë, por një njeri i madh. Në të tilla raste thuhet se humbëm një gazetar të mirë, por gazetaria s’ka “nevojë” shumë sot për gazetarë të mirë. Tragjedia është se ne humbëm një njeri kaq të mirë e me botë kaq të madhe, sa vetëm ata që e kishin pranë e dinë. Kjo po që është humbje, sepse për të tillë njerëz, shoqëria jonë është e uritur sot. Lamtumirë vëlla! S’mund ta tregoj pikëllimin që ndiej, s’do ta them, do e ruaj si kujtim për ty.
POLITIKANET KUJTOJNE GAZETARIN Kryeministri Edi Rama, duke e konsideruar gazetarin Fatos Baxhaku si mik të kohëve të vjetra, shpreh keqardhjen për ndarjen nga jeta të gazetarit. “E pabesueshme, por fatkeqësisht jeta është edhe kjo, pa u zbutur një fije pikëllimi për Gjergj Xhuvanin, një tjetër mik i kohëve të vjetra, Fatos Baxhaku, njeri i mirë i librave e i gazetarisë së sojit më të mirë, që jetoi me një kuriozitet fëminor për natyrën njerëzore dhe me një dashuri pa zhurmë për brendinë e këtij vendi, sot e humbi betejën me sëmundjen sfilitëse... Lamtumirë Baxhak”, shkruan Kryeministri Edi Rama.
Edhe kreu i Partisë Demokratike, Lulzim Basha, duke e konsideruar Baxhakun si një ikonë të gazetarisë së re të Shqipërisë, ka kujtuar kontributin e tij në media. “Fatos Baxhaku i përket asaj plejade gazetarësh, që kontribuuan më së shumti që të mos e linin gazetarinë të humbte thelbin e vet e të bëhej nga mbrojtëse e interesit publik, në zgjatim të interesave okulte. Në këtë fushë Baxhaku spikati në mësimdhënien e gazetarisë, por edhe si një shembull integriteti profesional dhe pavarësie”, shkruan ndër të tjera Basha.
Kryeministri Ilir Meta ka shprehur gjithashtu ngushëllimet e tij për largimin e gazetarit. “Në këto momente dhimbjeje të madhe, ju shpreh ngushëllimet e mia të ndjera dhe jam pranë familjes dhe gjithë të afërmve të tij, të cilët humbën njeriun e tyre më të dashur, por edhe pranë komunitetit të gazetarëve që humbën shokun, mikun, kolegun e pazëvendësueshëm, modelin e profesionistit, i cili asnjëherë nuk bëri kompromis në dëm të përmbushjes së misionit, që iu dedikua me pasion dhe përkushtim shembullor. Fatosi do të na mungojë të gjithëve, por do të jetojë gjithnjë emri, thjeshtësia dhe mirësia e tij. Lutem që shpirti i tij të prehet në paqen e përjetshme”, shkruan Meta.