Dhunonte bashkëshorten, arrestohet 60- vjeçari në Kamzë
Policia e Tiranës njoftoi dje arrestimin e një 60- vjeçari, pasi dhunonte dhe dyshohet se do të vriste bashkëshorten e tij. Duke iu referuar njoftimit zyrtar, Policia ka bërë ndërhyrjen në banesën e çiftit pas njoftimit për një sherr. Ndërkohë, gjatë kontrollit në banesë, shtetasit R. S., iu gjet edhe një armë e sekuestruar në cilësinë e provës materiale. "Shërbimet e Komisariatit të Policisë Nr. 5 Kamzë, parandalojnë një ngjarje të rëndë kriminale brenda familjes. Marrja në kohë e informacionit, si dhe ndërhyrja me profesionalizëm e forcave të Policisë të Komisariatit Nr. 5, parandaloi përshkallëzimin e një konflikti mes një çifti bashkëshortësh. Arrestohet në flagrancë një shtetas, si dhe bllokohet në cilësinë e provës materiale një armë zjarri automatik me qytë druri, 2 karikatorë dhe 96 fishekë, të cilat u gjetën gjatë kontrollit në banesë", njoftoi dje Policia.
NDËRHYRJA Kanë qenë qytetarët që kanë njoftuar për konfliktin e rëndë mes dy bashkëshortëve që ka vënë në dijeni Policinë, e cila më pas ka bërë edhe ndërhyrjen. Për armën e zjarrit që u gjet në banesë, Policia thotë se ka dyshime që me të do të kryhej krimi në familje. Shërbimet e Komisariatit të Policisë Nr. 5 Tiranë, pas marrjes së informacionit se në Bathore, Kamzë po ndodhte një konflikt i ashpër midis dy bashkëshortëve, organizuan menjëherë punën dhe me veprimet e shpejta dhe profesionale bënë të mundur parandalimin e mëtejshëm të këtij konflikti duke arrestuar në flagrancë shtetasin: R. S., 60 vjeç, banues në Bathore, Kamzë. Gjithashtu falë veprimeve të shpejta është bërë i mundur edhe bllokimi i armës së zjarrit automatik me dy karikatorë me fishekë, me të cilën ky shtetas dyshohet se do të kryente krim në familje, si dhe 96 fishekë. Materialet procedurale iu referuan Prokurorisë së Rrethit Gjyqësor Tiranë, për veprat penale ' Mbajtja pa leje dhe prodhimi i armëve, armëve shpërthyese dhe i municionit' dhe ' Dhuna në familje' në ngarkim të shtetasit R. S.", njoftoi Policia.