Meta: Rama përgjegjës për krizën, opozita la fushën bosh dhe pa mbrojtje qytetarët
"Opozita ka përgjegjësi të mëdha, la pa mbrojtje të gjithë qytetarët e Shqipërisë nga abuzivizmi"
Presidenti Meta deklaroi në një intervistë për "RTK 21" se kriza politike në Shqipëri është artificiale dhe palët duhet të reflektojnë për kapërcimin e saj. Gjatë intervistës, kreu i shtetit lëshoi kritika të forta ndaj Kryeministrit Rama, duke e cilësuar si fajtorin kryesor të krizës, si edhe për opozitën, që sipas tij, la qytetarët të pambrojtur duke djegur mandatet dhe duke mos u futur në zgjedhje. AKUZA PËR SHKELJE TË KUSHTETUTËS
Asnjëherë në botë, nëse keni parasysh këto lajmet e fundit. Si mund të shkelet Kushtetuta, kur e gjithë Kushtetuta e Republikës së Shqipërisë bazohet mbi pluralizmin politik dhe mbi të drejtën e zgjedhjes? Kështu që të gjitha veprimet kanë qenë konform Kushtetutës dhe parimeve të saj themelore dhe kjo nuk është vetëm një përpjekje e imja, por edhe Presidentë të tjerë në të kaluarën, në momente krizash, kanë bërë gjithçka për të evituar zgjedhje pa opozitën. Sepse kuptohet, kjo është një gjë mjaft e rëndë për çdo vend demokratik, aq më tepër për një vend si Shqipëria që 45 vjet vuajti aq shumë nga zgjedhjet njëpartiake, nga votimet moniste, sepse ato nuk ishin zgjedhje.
POLITIKANI I NEVOJSHËM PËR NE
Për Shqipërinë është e nevojshme që të gjithë politikanët të vënë interesat e vendit mbi interesin e axhendave të tyre afatshkurtra dhe t'i shërbejnë stabilitetit të vendit, dialogut politik, forcimit të institucioneve demokratike, sidomos institucioneve të pavarura. Sepse Shqipëria po vuan një largim serioz të të rinjve, të gjeneratës më krijuese dhe më të domosdoshme për zhvillimin e vendit dhe kjo ndodh për shkak të këtij konflikti që vazhdon në Shqipëri, në një mënyrë skizofrenike do të thosha, edhe pas 30 vjetësh. Është një konflikt tërësisht artificial dhe që është një kambanë alarmi për të reflektuar të gjithë urgjentisht. Nuk mund të jetë Shqipëria, jo vetëm për qytetarët e Shqipërisë, por për të gjithë shqiptarët kudo ku jetojnë, një shembull as frymëzimi dhe as pozitiv, në këtë mënyrë siç zhvillimet e fundit kanë ndodhur në vendin tonë për fat të keq.
SHANTAZHIMI I PRESIDENTIT
Presidenca është institucion që, jo vetëm nuk shantazhohet nga sjellje të tilla, por përkundrazi është edhe më e motivuar për t'u shërbyer atyre qëllimeve kombëtare që ka për detyrë Presidenti që të angazhohet dhe të mbrojë demokracinë e pluralizmin politik në vend, në një situatë tërësisht anormale, po të kemi parasysh situatën në Parlament, situatën e fundit para dhe pas 30 qershorit, por njëkohësisht edhe faktin që vendi është pa institucionet kryesore të drejtësisë apo me institucione tërësisht tranzitore dhe të kontestuara. Pra, është në situatë dëshpëruese. Megjithatë, unë kam bindjen që kjo situatë me një reflektim më të gjerë të gjithë shoqërisë dhe me një reflektim të të gjitha palëve, duke filluar tashmë nga opozita, do të mund të ecë në drejtimin e duhur, megjithëse me shumë vonesë dhe me kosto të tmerrshme.
ZGJIDHJA NGA ZGJEDHJET
Nuk ka zgjidhje tjetër përveç zgjedhjeve, sepse vetëm përmes tyre mund të rivendoset demokracia në shinat e saj. Po kështu mund të funksionojë një drejtësi e pavarur dhe një ekonomi për të gjithë shqiptarët, jo vetëm për atë që unë e quaj një pakicë që nuk njeh rotacion dhe që përfiton me të gjitha qeveritë, duke bërë ligje të veçanta, për persona të veçantë dhe për interesa të veçanta në dëm të interesit publik dhe të të gjithë funksionimit të shtetit të së drejtës.
FAJTORI I KRIZËS
Situata në Shqipëri duhet të kemi parasysh që është pasojë e në krize artificiale, ku pa asnjë diskutim përgjegjësinë kryesore e ka Kryeministri aktual me politikën e tij të qartë për të kontrolluar gjithë pushtetet në vend dhe për të asgjësuar demokracinë, dialogun politik, të drejtat e opozitës dhe të pakicave, lirinë e medias, pavarësinë e gjithë institucioneve të tjera për të kapur edhe sistemin e ri të drejtësisë, për fat të keq. Dhe njëkohësisht nuk mund të mbetet pa përgjegjësi edhe opozita, që në vlerësimin tim ka ndjekur një strategji të gabuar, atë të djegies së mandateve, të mosmarrjes pjesë në zgjedhjet vendore, pra të mosregjistrimit në kohë, por edhe të deligjitimimit të çdo institucioni, ndërkohë që mund të kishte ndjekur një politikë tjetër. Atë të paraqitjes së një alternative që mund të ndihmonte në parandalimin e kësaj drame institucionale dhe demokracie që ne sot kemi në vend, ku praktikisht sistemi i llogaridhënies është asgjësuar si në nivel qendror, në Parlament, si në nivel vendor dhe vendi përjeton një rrëmujëhane institucionale, për fat të keq.
EKUILIBRI POLITIK
Mendoj që situata në Shqipëri është rezultat i përjashtimit të qytetarëve shqiptarë nga mundësia e tyre për të ndikuar dhe për të thënë fjalën e tyre në qeverisjen e vendit si në nivel qendror, si në nivel vendor. Rrënjët e kësaj që ka ndodhur apo që ka kulmuar kohët e fundit në Shqipëri, për mua gjenden në ndryshimet e befasishme të Kushtetutës së Shqipërisë në vitin 2008, kur u ndryshua edhe sistemi zgjedhor dhe u vendos sistemi me listat e mbyllura, i cili praktikisht e ktheu vendin nga një Republikë Parlamentare në një republikë kryetarësh dhe asgjësoi lidhjen e deputetëve me qytetarët dhe mundësinë e qytetarëve për të zgjedhur apo për të përkrahur atë deputet, te të cilët ata kishin besim që do të mbronin të drejtat e tyre. Kështu që, praktikisht, gjatë këtyre 11 vjetëve, demokracia në Shqipëri ka ardhur duke degraduar dhe kjo është vënë re që te Parlamenti dhe te të gjitha institucionet e tjera, dhe mbi të gjitha te mënyra se si realizohet vendimmarrja e qeverisë dhe së fundi se si Parlamenti përdoret thjesht për të mbuluar paligjshmërinë e akteve të qeverisë. Pra, bëhen ligje për persona të veçantë në kundërshtim me Kushtetutën e vendit, në kundërshtim me detyrimet që Shqipëria ka nga Marrëveshja e Stabilizim- Asociimit me BE- në, në kundërshtim me konkurrencën, në kundërshtim me parimet e mosdiskriminimit, që është një parim kushtetues e kështu me radhë.
Pa asnjë diskutim, përgjegjësinë kryesore e ka Kryeministri aktual me politikën e tij të qartë për të kontrolluar gjithë pushtetet në vend dhe për të asgjësuar demokracinë, dialogun politik, të drejtat e opozitës dhe të pakicave, lirinë e medias, pavarësinë e gjithë institucioneve të tjera për të kapur edhe sistemin e ri të drejtësisë, për fat të keq.
KRITIKA PËR OPOZITËN
Unë mendoj që opozita ka përgjegjësi shumë të mëdha, sepse në radhë të parë opozita nuk është tërësia e partive, të cilat ndodhen në opozitë, për shkak se nuk ndodhen në pushtet. Por opozita në një demokraci është institucioni më i rëndësishëm demokratik që ka një vend, sepse është aspirata e qytetarëve për një qeverisje më të mirë nesër. Nuk bëhet fjala thjesht për Ramën, por gjithmonë opozita është ajo forcë që garanton vetëm të drejtat e atyre që votojnë për opozitën, por garanton, përmes rolit të saj në kuvend, në pushtet vendor, në të gjitha institucionet e tjera, garanton edhe të drejtat e atyre që kanë votuar për shumicën. Kush do t'i mbrojë ato? Në kushtet kur opozita largohet nga Parlamenti, në kushtet kur opozita nuk merr pjesë në zgjedhjet vendore dhe e lë fushën bosh, lë pa mbrojtje të gjithë qytetarët e Shqipërisë nga abuzivizmi i atyre që drejtojnë dhe të cilët duhet të jenë edhe nën kontrollin institucional të opozitës për interesat e qytetarëve.