PD: Agim Kajmaku ka qenë i arrestuar në Greqi
"Zëri i Amerikës": Edhe Valdrin Pjetri i mohoi fillimisht akuzat
Partia Demokratike iu drejtua dje Prokurorisë së Përgjithshme me një kërkesë zyrtare për të verifikuar një tjetër kryebashkiak të maxhorancës. Shkresa, e cila mban firmën e Sekretarit të Përgjithshëm të PD- së, Gazmend Bardhi, thekson se ka dyshime se kryetari i Bashkisë së Shkodrës ka falsifikuar formularin e dekriminalizimit pasi, sipas PD- së, ai ka precedent penal në Greqi. "Ai dyshohet se ka qenë i arrestuar/ ndaluar në Greqi dhe, më pas, ndaj tij është marrë masa e dënimit dhe dëbimit nga autoritetet përgjegjëse greke. Në formularin e vetëdeklarimit, shtetasi Agim Kajmaku alias Jorgo Toro ka deklaruar se ka jetuar për 5 vite në Greqi. Nga verifikimi i të dhënave të sistemit TIMS rezulton se shtetasi Agim Kajmaku alias Jorgo Toro nga periudha 2004- 2016 nuk ka udhëtuar në asnjë rast të vetëm në drejtim të Greqisë, çka përbën një indicie për saktësinë e të dhënave të bëra publike më parë", argumenton PD. Njësoj si në rastin e Valdrin Pjetrit, PD e ka shoqëruar kërkesën e saj me 500 firma qytetarësh. "Nisur nga interesi i lartë publik që paraqet kjo çështje, Partia Demokratike e Shqipërisë pret një verifikim dhe reagim institucional të shpejtë nga ana e Prokurorisë së Përgjithshme, me synimin që të arrihet qëllimi primar që ka ligji i dekriminalizimit. Konkretisht, qëllimi i ligjit është të garantojë besimin e publikut në funksionimin e organeve të zgjedhura shtetërore, nëpërmjet pengimit të zgjedhjes ose emërimit në to të personave, të cilët janë dënuar për kryerjen të krimeve", thuhet më tej në kërkesën e PD- së. Pas kësaj kërkese të PD- së, reagoi vetë Agim Kajmaku, i cili theksoi se do të padisë demokratët për shpifje. "Sapo jam njohur me një tekst letre të publikuar nga PD, ku pretendohet se unë jam dënuar dhe dëbuar nga shteti grek. Me përgjegjësi ligjore dhe morale deklaroj se nuk jam dënuar dhe as jam dëbuar asnjëherë nga ndonjë shtet i BE- së, as nga Greqia. Ndërkohë që për vite të tëra kam qenë udhëtues i shpeshtë dhe korrekt në shumë vende të BE- së, për llogari të biznesit tim familjar. Autorët dhe akuzuesit publikë që shpifin ndaj personit tim, për një qëllim të vetëm, atë të ndotjes politike të kundërshtarit, do të vihen përballë drejtësisë dhe detyrimit të gjetjes së provave të pretenduara", u shpreh Kajmaku.
Lajmi që PD kërkoi verifikimin e formularit të dekriminalizimit të kryetarit të Bashkisë së Vorës zuri hapësirë mediatike edhe te "Zëri i Amerikës". Në një kronikë të posaçme, "Zëri i Amerikës" theksoi se ashtu si në rastin e Valdrin Pjetrit, edhe Agim Kajmaku theksoi se nuk është i dënuar. "Mbetet të shihet nëse Partia Demokratike është nisur vetëm nga disa akuza publike, apo si në rastin e ish- kryebashkiakut të Shkodrës, Valdrin Pjetri, zotëron ndonjë dokument zyrtar ku mbështet denoncimin e saj. Edhe zoti Pjetri fillimisht mohoi akuzat e ngritura nga PD- ja, se kishte qenë i dënuar dhe më pas i dëbuar nga Italia. Por pas publikimit të dokumenteve të autoriteteve gjyqësore italiane nga ana e Partisë Demokratike, u detyrua të japë dorëheqjen javën e shkuar", theksohej në lajmin e "Zërit të Amerikës".