Burg për drejtoreshën e Fondit “Besa”, avokati: Veprimet e saj, të pakuptimta
Gjykata caktoi arrest në burg për Albana Imamin dhe 3 të tjerë Sekserja në Gjykatë: Më kanë mashtruar, unë kam futur edhe fëmijët e mi në këtë punë dhe merrja 20 mijë lekë të vjetër
Duke pranuar skemën e kredive fiktive, por pa pranuar përfitimin e vlerave monetare prej tyre, 6 të arrestuarit nga Policia janë përballur dje me akuzat në Gjykatën e Tiranës.
Kjo e fundit la në burg katër nga të arrestuarit, duke lehtësuar masën për dy të tjerë. Konkretisht, në burg deri në fund të hetimeve do të rrinë, drejtoresha e filialit të Fondit “Besa”, Albana Imami, oficeret e kredisë, Blerta Kanani, Mihal Hanxhari, dhe sekseria Orkida Drizi. Ndërsa për shkak të rrethanave të familjes dhe shëndetësore, u caktua “Arrest në shtëpi” për Matilda Domin dhe Esmeralda Vason. Seanca, e cila zgjati rreth dy orë, u zhvillua mes debatit, ku nuk munguan as lotët nga të arrestuarat dhe të dyshuara se kanë konsumuar veprat penale “Skemat mashtruese dhe piramidale” dhe “Vjedhja duke shpërdoruar detyrën”. Teksa shpjegoi rrethanat në të cilat kanë ndodhur veprimi i të dyshuarve, prokurori Kolë Hysenaj, i tha gjykatës se e dyshuara Albana Imami në këtë aktivitet të kundërligjshëm ka pasur rolin kryesor dhe ka bashkëpunuar me punonjësit e saj.
Prokuroria e akuzon për rekrutimin e njerëzve në punë, duke krijuar klientë fiktivë dhe përpiluar dokumente fiktive e ka ushtruar influencën e saj te vartësit për të pranuar praktikat fiktive. Në fund, Hysenaj kërkoi lënien në burg të 5 prej të arrestuarve dhe caktimin e një mase më të butë për një prej të dyshuarave, për shkak se është nënë e një foshnjë.
SEANCA Avokati i së dyshuarës Albana Imami, Pjerin Deda: Shumat që ka marrë nga dhënia e kredive fiktive, i ka derdhur sërish në fondin “Besa”. Veprimet e saj janë të pakuptimta dhe i ka kryer në gjendje deliri. Imami e ka denoncuar vetë tek eprorët e saj këtë praktikë. Në lidhje me kërkesën për masë sigurie, kërkojmë një masë më të butë, atë të “Arrestit në shtëpi”.
Albana Imami: Nuk kam qenë koshiente për çfarë kam bërë, jam dakord me avokatin për pjesën tjetër
Avokatja e së dyshuarës Blertina Kanani, Andia Dragoi: Masa e kërkuar nga prokurori është shumë e ashpër. E mbrojtura prej meje ka rrezikshmëri të ulët, duhet të caktohet një masë më e butë. Ne ofrojmë edhe një garanci pasurore. Kanani është edhe sëmurë, gjatë vizitave i është konstatuar edhe një masë tumorale dhe duhet të jetë nën kujdes mjekësor.
Avokatja e së dyshuarës Matilda Domi, Violeta Pustina: Duke qenë se kam qenë që në momentin që oficerët e Policisë gjyqësore kanë kryer veprime në banesën e Domit, them me bindje se arrestimi duhet të konsiderohet i paligjshëm. Masa e dënimit që parashikohet për veprat penale që akuzohet e mbrojtura prej meje nuk parashikon arrest në flagrancë. Shtatë ditë para se të kryhej arrestimi, Matilda Domi ka dhënë shpjegime dhe nuk është larguar. Kjo nuk është lojë e Matildës, janë lojëra të të tjerëve më lart. Për shkak se Matilda ka kryer një operacion të rëndë dhe ka hekur në këmbë, ne kërkojmë një masë më të butë.
I dyshuari Mihal Hanxhari: Para tre muajsh kam dhënë dorëheqjen nga detyra që kam pasur, pikërisht për këtë punë. Unë nuk kam lidhje me këtë dhe e gjej veten kot këtu.
Avokati i së dyshuarës Orkide Driza, Enea Cenko: Orkide Driza nuk është person me rrezikshmëri të lartë, është me tetë klasë shkollë dhe nuk e dinte që po kryente vepër penale. Ajo është e vetmja që ka bashkëpunuar dhe do të bashkëpunojë me prokurorinë për zbardhjen e të vërtetës. Ne kërkojmë një masë më të butë, atë të detyrimit për t’u paraqitur.
Orkide Driza: Mua më kanë mashtruar, nuk i dal dot fëmijëve të mi para. Kam futur edhe fëmijët e mi në këtë punë, merrja 20 mijë lekë të vjetra. Do të jem e gatshme të bashkëpunoj deri në fund. Më kanë thënë që t’i çoja dhe kam çuar edhe fëmijët e mi.