Filmat shqiptarë pushtojnë “Zemrën e Sarajevës”, në garë për çmimet e mëdha
"Open Door" i Florenc Papas konkurron në kategorinë e filmit artistik me metrazh të gjatë, "The Van" në atë të shkurtër
Filmat shqiptarë pushtojnë "Zemrën e Sarajevës". Filma me metrazh të gjatë, të shkurtër, dokumentarë apo në proces po prezantohen gjatë ditëve të festivalit.
"Filmi ' Derë e hapur' me regji nga Florenc Papas është shfaqur mbrëmë si pjesë e garës së Festivalit të Filmit në Sarajevë, që këtë vit zhvillon edicionin e 25- të. "Open door" ( Derë e hapur) konkurron për çmimet e mëdha të festivalit, mes 9 filmash artistikë të metrazhit të gjatë. Interpretojnë në të aktorët Luli Bitri, Jonida Voksi, Gulielm Radoja, Sotiraq Bratko etj. Filmi rrëfen historinë e dy motrave që do të ndërmarrin një rrugëtim, duke u ballafaquar hera- herës me forcën e sistemit tradicional- patriarkal. Personazhi kryesor është Elma, që është një vajzë e re shqiptare, e cila jeton ilegalisht në Itali. Ajo është shtatzënë dhe babai i fëmijës tashmë është në burg. Pas depërtimit nga Policia italiane, duke mos ditur kujt t'i drejtohet për ndihmë, ajo vendos të kthehet te motra e saj e madhe, Rudina.
Të dyja motrat do të nisin një rrugë të gjatë me veturë drejt shtëpisë së babait të tyre, i cili nuk do ta kuptonte dot kurrë pozicionin e Elmës, shtatzënë dhe me një partner në qeli.
Mbështetur nga Qendra Kombëtare e Kinematografisë, me producent Eno Milkanin, "Derë e hapur" është bashkëprodhim midis Shqipërisë, Kosovës, Italisë dhe Maqedonisë. Edicioni i këtij viti i "Sarajevo Film Festival" po zhvillohet nga data 16 deri më 23 gusht.
Në këtë edicion, në garën për filmin e shkurtër më të mirë konkurron edhe "The Van" me regji të Erenik Beqirit. Ky film shkon në Sarajevë pas konkurrimit në garën zyrtare në Festivalin e Kanës dhe një çmim si filmi më i mirë i shkurtër në "Molise Cinema Film Festival".
Të tjerë shqiptarë marrin pjesë në të tjera kategori. Nga Shqipëria, Romina Ruda ishte pjesë e Talent Campus, ndërsa Gent Koçi dhe Blerina Hankollari ishin pjesë e Work in Progress në Cinelink. Nga Kosova, Blerta Zeqiri merr pjesë në Cinelink Drama Series, Bekim Guri merr pjesë me dokumentarin e tij "Rutinë" dhe Sajmir Karahoda me dokumentarin e tij "Në Mes". Ndërsa Alban Ukaj përfaqëson Bosnjën me filmin e tij të shkurtër, "The pit".