Dosja “184”, Arta Marku: Pse u transferua në Dibër
Dibra refuzoi dosjen për mungesë stafi dhe konflikt interesi Prokuroria regjistroi procedim pa emër për krime zgjedhore
Nga konflikti i interesit, tek ekzistenca e grupit kriminal, apo mungesa e stafit për përballimin e dosjeve të tilla, këto ishin argumentet e Prokurorisë së Dibrës për refuzimin e dosjes “184”.
Të gjitha këto argumente janë rrëzuar nga Prokuroria e Përgjithshme, e cila me anë të një komunikimi zyrtar, dje, sqaroi vendimin për dërgimin e dosjes në Dibër. Në njoftim, Akuza qendrore bënë të ditur se kjo dosje është regjistruar për veprat penale të “Dhënies së shpërblimeve dhe premtimeve”, “Kanosjes apo dhunimit ndaj pjesëmarrësve në zgjedhje”, “Shpërdorimit të detyrës”, “Dhënies së shpërblimeve dhe premtimeve”, si dhe “Kanosjes apo dhunimit ndaj pjesëmarrësve në zgjedhje”, të kryera në bashkëpunim. Por, pavarësisht regjistrimit të procedimit penal, asnjë prej personave të dyshuar nuk është vënë ende nën akuzë, 3 vite nga nisja e hetimeve nga Prokuroria për Krime të Rënda. “Nga shqyrtimi i akteve, nuk rezulton që prokurori të ketë ngritur akuza për ndonjë prej personave nën hetim dhe për këtë arsye nuk ka qenë e nevojshme t’i drejtohej gjykatës me kërkesë për pushimin e tyre”, shkruhet në njoftimin e Prokurorisë. Ndërkohë, dërgimi në Dibër pritet të zvarrisë edhe më shumë rezultatin final të kësaj dosjeje, në kushtet kur askush nuk e ka pranuar dhe me shumë gjasë zgjidhja do të vijë nga Këshilli i Lartë i Prokurorisë, që do t’i duhet të delegojë një prokuror tjetër për hetimin e saj. PROKURORIA E DIBRËS
Duke iu referuar komunikimit të Prokurorisë së Përgjithshme, rezulton se Prokuroria e Dibrës e ka bazuar refuzimin e dosjes në katër argumente. Së pari, veprat penale janë kryer nga grupi i strukturuar kriminal dhe për këtë vepër është kompetente Prokuroria për Krime të Rënda. Së dyti, prokurori duhet t’i ishte drejtuar gjykatës për pushimin e akuzave dhe jo të procedonte me ndryshim të cilësimit juridik. Së treti, prokurorët e Prokurorisë Dibër janë në kushtet e konfliktit të interesit dhe nuk mund ta hetojnë çështjen në fjalë dhe së katërti, Prokuroria Dibër nuk ka staf të mjaftueshëm për të përballuar këtë çështje. Hetimet për dosjen 184 kanë nisur në vitin 2016, pas akuzave publike të bëra nga opozita për vjedhjen e votave gjatë përsëritjes së procesit zgjedhor në Dibër. Kujtojmë se pas një skandali seksual dha dorëheqjen drejtuesi i bashkisë në atë kohë, Shukri Xhelili. Prokuroria vuri nën përgjim një sërë numrash në atë kohë, ndërsa hetimet u zgjatën në kohë për një periudhë prej 3 vitesh, ku nga rezultati, duket se Prokuroria e Krimeve të Rënda nuk ka kryer asnjë veprim tjetër hetimor përveç përgjimeve.