Mes duartrokitjesh, deputetët e Kosovës shkrijnë Kuvendin
Ja datat e mundshme të zgjedhjeve, KQZ: Nuk kemi fonde për votime
Legjislatura e gjashtë e Kuvendit të Kosovës nuk e përfundoi mandatin e plotë katërvjeçar pas votimit pro shpërndarjes së Kuvendit dhe për mbajtjen e zgjedhjeve të parakohshme nga të gjitha partitë politike.
Kuvendi u vetëshpërbë pasi liderët e partive politike nuk pranuan të paraqesin të Presidenti Hashim Thaçi një mandatar për krijimin e një qeverie të re, pas dorëheqjes së Ramush Haradinajt, duke preferuar zgjedhjet e reja. Sipas mediave në Kosovë, rrallëherë këto dy vjet ka ndodhur që mbi 100 deputetë të jenë të pranishëm në një seancë të Kuvendit të Kosovës dhe kjo ka ndodhur vetëm në seancën kur u votua për shpërndarjen e tij. Pasi deputetët nënshkruan për herë të fundit dhe zunë vendet e tyre, ish- Kryetari i Kuvendit, Kadri Veseli, mbërriti në sallë i buzëqeshur dhe bëri një urim për legjislaturën e ardhshme, ka raportuar KTV. Përmes mocionit, Veseli i hapi rrugë votimit për shpërndarje, ku 89 deputetë votuan pro, 1 ishte kundër dhe dy abstenuan. Kryeministri në detyrë, Ramush Haradinaj, vendimin e deputetëve e quajti shenjë të pjekurisë politike. Ai përsëriti gatishmërinë për bashkëpunim me Nismën dhe AKR- në dhe tha se qytetarët do të jenë ata që vendosin se kush do ta udhëheqë vendin. Kryetari i Kuvendit, Kadri Veseli, konfirmoi kandidaturën e tij për Kryeministër. Zgjedhje të reja kërkoi edhe shefi i Grupit Parlamentar të LDKsë, Avdullah Hoti. Për koalicionin e mundshëm me LDKnë e tij, ka folur Kryetari i Lëvizjes Vetëvendosje, Albin Kurti. DATAT E MUNDSHME
Zgjedhjet, sipas Kushtetutës, nuk duhet të mbahen më herët se 30 ditë dhe më vonë se 45 ditë që nga shpërndarja e Kuvendit. Fundi i muajit shtator apo fillimi i tetorit, saktësisht datat 29 shtator dhe 6 tetor, janë dy datat, të cilat janë përfolur si të mundshme për organizimin e zgjedhjeve të reja. Megjithatë, një gjë e tillë tashmë është në dorën e Presidentit të Kosovës, Hashim Thaçi, i cili ka njoftuar sot se menjëherë do të fillojë procedurat për dekretimin e zgjedhjeve të parakohshme. Pika 2 e nenit të 66 të Kushtetutës së Republikës së Kosovës saktëson që zgjedhjet e reja në rast të shpërndarjes së Kuvendit, mbahen jo më vonë se dyzet e pesë ditë pas shpërndarjes. Fushata e partive politike për këto zgjedhje pritet të zgjasë vetëm 10 ditë, kohë kjo kur ato do të publikojnë edhe programet e tyre, me të cilat pretendojnë të qeverisin me Kosovën. Ndërkohë, zëdhënësi i KQZsë, Valmir Elezi, në një deklarim për mediat sot, ka thënë se nuk kanë mjete financiare për organizimin e zgjedhjeve të reja. Bashkimi Europian e shtetet, të cilat janë të interesuar që të vazhdojë dialogu për normalizimin e raporteve ndërmjet Kosovës dhe Serbisë, kanë thënë se nuk duhet të ketë vonesa në krijimin e institucioneve të reja.
KOALICIONET Deri tani, vetëm dy parti kanë nënshkruar koalicion parazgjedhor në mes tyre. Bëhet fjalë për AAK- në e Ramush Haradinajt dhe PSD- në e Shpend Ahmetit. Një koalicion tjetër që po përflitet se mund të ndodhë është ai ndërmjet LD- së dhe Lëvizjes Vetëvendosje, megjithatë posti i Kryeministrit duket të jetë pikë ndarëse për dy partitë. NISMA e Fatmir Limajt duket se ka vendosur që të garojë e vetme, ndërkohë PDK- së nuk i është ofruar ende asnjë parti për bashkëpunim.