AKU bllokon 387 tonë mish me salmonelë, kompanitë që e importuan
"Produktet e importuara rezultuan të pasigurta për konsum, nga analizat u konstatua prezencë salmonele dhe ractopamine"
Më shumë se 387 tonë mish i planifikuar për t'u futur në tregun shqiptar, është bllokuar nga Autoriteti Kombëtar Ushqimor.
Sasia e ndaluar, e ndarë në 15 ngarkesa, ka rezultuar e pasigurt dhe për më tepër e dëmshme për konsumatorët. Nga analizat e kryera është vërejtur prania e salmonelës dhe ractopaminës, ( kjo e fundit një produkt mjekësor veterinar i ndaluar për vendin tonë). Po ashtu, në sasinë e bllokuar të mishit është konstatuar mangësi në dokumentacion, që shërben si garanci për sigurinë e produktit. AKU ka bërë publike dje edhe emrat e kompanive të përfshira në këtë skandal.
BLLOKIMI "FRIGO ALB shpk", "Apetit shpk", "ZICO sh. a, AMG shpk", KING MEAT," janë disa nga kompanitë, të cilat qëndrojnë pas sasisë së mishit të bllokuar nga AKU. Ndërsa vendet e importit janë kryesisht Brazili dhe Kanadaja. "Kontrollet e kryera nga inspektorët e ushqimit të AKU- së në Pikën e Inspektimit Kufitar Durrës gjatë ditëve të fundit kanë konkluduar se disa ngarkesa me produkte importi janë të pasigurta për konsum njerëzor dhe si rrjedhojë kanë vendosur për kthimin e tyre në vendin e origjinës. Më konkretisht: Tri ngarkesa me sasi totale 74.946 tonë ' mish derri' me origjinë nga Kanadaja, importuar nga subjekti "FRIGO ALB shpk", rezultuan se nuk përmbushnin kërkesat ligjore të sigurisë ushqimore dhe kishin mangësi në besueshmërinë e dokumentacionit shoqërues ( kryesisht të certifikatës veterinare si dokumenti kryesor i sigurisë së produktit, si dhe certifikatat e analizave raportonin prezencë ractopaminë, një produkt mjekësor veterinar i paregjistruar dhe i ndaluar për përdorim në Shqipëri dhe në BE)", thuhet në njoftimin e AKU- së. Po ashtu, dy ngarkesa me sasi totale 52.257 tonë "mish viçi" me origjinë nga Brazili, importuar nga subjekti "Apetit shpk", në rrgjim transit në territorin e Shqipërisë me destinacion final Kosovën, rezultuan me mangësi dhe mospërputhje thelbësore në dokumentacionin shoqërues të mallit. Certifikata e origjinës dhe ajo veterinare, sipas AKU- së, mbanin të dhëna të ndryshme nga dokumenti i transportit dhe fatura komerciale), çka e bën mallin ushqimor të importuar pa identitet të konfirmuar dhe të pasigurt për konsum. Ndërkohë, më shumë se 100 tonë mish ka rezultuar me prezencë të salmonelës, e cila përbën kërcënim serioz për jetën. Bëhet fjalë për katër ngarkesa me sasi totale 107.240 tonë ' mish derri' me origjinë nga Brazili, importuar nga kompania ' ZICO sh. a'. "Këto ngarkesa rezultuan me ngarkesë mikrobiologjike. Analizat laboratorike raportuan prezencën e salmonella sp) dhe si rrjedhojë, produkti ushqimor i importuar është i pasigurt dhe i papërshtatshëm për konsum njerëzor. Për këtë arsye dhe referuar bazës ligjore dhe rregullave në fuqi, Autoriteti Kombëtar i Ushqimit vendosi kthimin e këtyre ngarkesave në vendin e origjinës", thuhet në njoftim. Deri më tani raportohet se janë kthyer 234 tonë mish. NË PROCES KTHIMI Në proces kthimi janë edhe 152.6 tonë të tjera mishi i ndarë në 6 ngarkesa. Më konkretisht: 51.984 tonë "mish derri" me origjinë nga Brazili, importuar nga subjekti "AMG shpk", 27 tonë "fileto pule" nga Brazili, importuar nga subjekti "KING MEAT", 25.999 tonë "mish derri" nga Brazili, importuar nga subjekti "FRIGO ALB shpk" dhe 22.648 tonë "mish viçi" nga Brazili, importuar nga subjekti "DEKON FRIGO shpk".