Basha: Vendi nën diktaturën e krimit, drejtësia s’vjen nga persekutorët e rilindur
Viktimat e komunizmit, PD: Gjetjen e eshtrave të të zhdukurve, ndalimin e simboleve komuniste, nderim të viktimave të regjimit
Kryetari i Partisë Demokratike, Lulzim Basha, premtoi dje tri zotime publike në nderim të viktimave të komunizmit në Shqipëri.
Në kuadër të ditës së kujtesës për viktimat e regjimeve totalitare, Basha ndërmori tri angazhime të rëndësishme publike. Në një postim në “Facebook”, Basha thekoi se: “Në këtë ditë kujtese, rikonfirmoj në emër të Partisë Demokratike, së bashku me ndjesën që nuk kemi arritur të bëjmë gjithçka nevojitet për nderimin e sakrificës së të përndjekurve politikë, për gjetjen dhe nderimin e eshtrave të të ekzekutuarve pa gjyq, vendosmërinë tonë që në Parlamentin e dalë nga vota e lirë, do të miratojmë ndër aktet e para: ndalimin dhe kriminalizimin e simboleve të komunizmit dhe nderimin për xhelatët e diktaturës, që kanë për qëllim të fshijnë çdo kujtesë të sakrificës dhe rezistencës për liri; nderimin e viktimave të komunizmit, për të sprapsur revanshin komunist, i cili u rilind dhe u materializua, me vendimin kriminal për të hequr dhe kufizuar dëmshpërblimin për pasardhësit e të ekzekutuarve; angazhimin ligjor dhe financiar për gjetjen dhe nderimin e të ekzekutuarve pa gjyq që sot janë pa varr dhe eshtrat e të cilëve nuk gjenden”, thekoi Basha. Në vijim të qëndrimit të tij, kryedemorkati Basha nënvizoi se drejtësia për viktimat e komunizmit nuk mund të vijë nga persekutorët e rilindur. Ai theksoi se Shqipëria është vendosur nën një tjetër diktaturë të krimit. “Drejtësia nuk mund të vijë nga persekutorët e rilindur. Shqipëria është vendosur nën një tjetër diktaturë të krimit. Për pushtetin dhe pasurimin e tij të paligjshëm, Edi Rama ka kthyer Policinë politike, Prokurorinë dhe Drejtësinë private dhe burgosjet e gjyqet politike. Ndërkohë, kriminelët dhe pushtetarët hajdutë janë mbi ligjin gëzojnë pandëshkueshmëri dhe mbrojtje nga Edi Rama”, theksoi kreu i PD- së. Në mbyllje të postimit, Basha u shpreh se Edi Rama duhet të largohet me çdo çmim dhe shqiptarët kanë për ta fituar këtë betejë. “Kjo e keqe do të ndalet me çdo kusht e me çdo çmim dhe shqiptarët e bashkuar do ta fitojnë betejën për vlerat themelore të demokracisë, votën e lirë dhe nderimin e trajtimin dinjitoz të të përndjekurve politikë e të të gjithë shqiptarëve të ndershëm”.