Lleshaj, kritika drejtuesve të Policisë për krimin e sigurinë
"Mbani nën kontroll të vazhdueshëm personat me profil kriminal"
Ministri i Brendshëm, Sandër Lleshaj, zhvilloi dje një takim me drejtuesit kryesorë të Policisë së Shtetit të nivelit qendror dhe vendor, të cilët raportuan për gjendjen e sigurisë dhe të rendit publik në vend.
Në fjalën e tij, ministri Lleshaj u ndal në mënyrë të veçantë te nevoja e intensifikimit të punës së drejtuesve dhe strukturave të Policisë kundër veprimtarisë së rëndë kriminale në vend. Sipas tij, sezoni i suksesshëm turistik ka sjellë si rezultat që Shqipëria të ketë aktualisht rreth dy herë më shumë banorë, sesa në ditët e zakonshme të vitit. E për këtë arsye, bashkë me rritjen e jashtëzakonshme të numrit të përgjithshëm të njerëzve në vend, janë rritur shumë edhe sfidat dhe problemet me të cilat duhet të merret Policia e Shtetit, e cila është po ajo. Ministri Lleshaj kërkoi me forcë rritjen e përpjekjeve parandaluese kundër personave me rekorde kriminale dhe rrezikshmëri të lartë, të cilët përpiqen të shfrytëzojnë këtë periudhë për qëllime kriminale. Një çështje që mori vëmendje të shtuar në takim, ishte lufta kundër korrupsionit në radhët e vetë strukturave policore. Duke evidentuar numrin e shtuar të punonjësve të Policisë që janë arrestuar apo që janë në proces hetimi penal për korrupsion, Lleshaj tërhoqi vëmendjen e drejtuesve të Policisë, ndaj të cilëve kërkoi përgjegjësi maksimale në goditjen e çdo rasti të korrupsionit dhe të cenimit të integritetit në radhët e Policisë së Shtetit.
KRITIKAT Duke kritikuar disa drejtues vendorë për ngjarje kriminale të ndodhura gjatë muajit gusht, ministri i Brendshëm, Sandër Lleshaj, përcaktoi detyra të qarta që duhet të ndiqen në periudhën në vijim. Ai kërkoi që të ushtrohet "presing" i mirëfilltë ndaj personave me profil kriminal, përfshirë edhe ata që kthehen në vend gjatë pushimeve, të bëhet mbikëqyrja parandaluese ndaj tyre, të kontrollohen mjediset e frekuentuara prej tyre, automjetet dhe veprimet e tyre. Kjo ishte detyra e parë që Lleshaj u përcaktoi drejtuesve të Policisë. Po ashtu, u kërkua shtimi i kontrolleve për armëmbajtjen pa leje në mjedise publike, si në qarkullimin rrugor, bare e diskoteka etj. Ministri kërkoi angazhim të fortë për menaxhimin efektiv të qarkullimit rrugor, në kushtet e rëndimit të tij, për shkak të flukseve të mëdha dhe të sjelljes së papërshtatshme të disa qytetarëve. Për strukturat kundër Krimit Ekonomik, u kërkua thellimi i angazhimit në operacionin e përbashkët kundër informalitetit në ekonomi. Lleshaj vuri theks të veçantë në masat kundër kultivimit dhe trafikimit të bimëve narkotike, ku evidentoi nevojën për vigjilencë të pandërprerë në këtë fushë. Të njëjtën vigjilencë kërkoi edhe në mbrojtjen nga zjarret në vend, në kushtet e thatësirës dhe temperaturave të larta, duke përcaktuar detyra për të gjitha strukturat e Policisë.