Nga Tirana në Durrës për të vjedhur, arrestohet autori i 13 ngjarjeve
DURRES - Përfundon me arrestim aventura e "Arsen Lypen- it" nga kryeqyteti, i cili ishte kthyer në një makth të vërtetë për banorët e qytetit bregdetar, ku kishte mundur të bastiste mbi 13 banesa në lagje dhe zona të ndryshme të Durrësit. Policia lokale bëri me dije se ka vënë në pranga 34- vjeçarin nga Tirana, i cili ushtronte aktivitetin e tij kriminal në Durrës. Sipas bluve, është bërë i mundur arrestimi i shtetasit me iniciale D. T., 34 vjeç, si dhe janë dokumentuar 13 vjedhjet që ai ka kryer përgjatë një harku kohor prej 45- ditësh në qytetin e Durrësit. "Zbardhen 13 vjedhje banesash në qytetin e Durrësit, falë bashkëpunimit Polici- komunitet, finalizohet operacioni ' Periferia' për goditjen e veprimtarisë kriminale në fushën e vjedhjes së banesave. Policia ka arrestuar në flagrancë 34- vjeçarin D. T., në tentativë për të vjedhur në një banesë. Specialistët për Hetimin e Krimeve në Komisariatin e Policisë Durrës, falë bashkëpunimit me qytetarët kanë arrestuar në flagrancë shtetasin D. T., 34 vjeç, banues në Tiranë, i dënuar më parë për veprën penale ' Vjedhje', i cili gjatë natës vidhte banesa në qytetin e Durrësit", tha Policia nëpërmjet një njoftimi për shtyp. Burime nga grupi hetimor thanë se 34- vjeçari është arrestuar në flagrancë, në lagjen Nr. 15 Durrës, në tentativë për të vjedhur banesën e shtetasit A. S., si dhe po gjatë orëve të para të mëngjesit të djeshëm kishte vjedhur në banesën e shtetasit M. Q., dy telefona celularë dhe vlera monetare. Të njëjtat burime saktësojnë se shtetasi D. T., gjatë 45 ditëve të fundit, ka realizuar edhe disa vjedhje të tjera banesash në periferi të qytetit të Durrësit. Ai, gjatë natës, duke përfituar që dritaret qëndrojnë të hapura prej temperaturave të larta, futej nëpër banesa, kur njerëzit ishin në gjumë dhe vidhte sende me vlerë. Televizorët, telefonat, bizhu, sende me vlerë dhe vlera monetare ishin objektivi i hajdutit profesionist nga kryeqyteti.