Kapet veliera me 1 ton drogë në Peloponez të Greqisë
Mediat greke: Vinte nga Shqipëria, ishte nisur nga Saranda
Një velierë që transportonte mbi një ton drogë, është bllokuar dje nga Policia greke në Peloponez, ndërsa mediat greke shkruanin se lënda narkotike ishte nisur nga Shqipëria dhe kishte destinacion Turqinë.
Nga ana tjetër, Policia shqiptare hedh poshtë versionin e gazetarëve grekë, duke saktësuar se mjeti lundrues i kapur atje, nuk ka asnjë hyrje- dalje në Shqipëri, ndërsa personat që u arrestuan si trafikantë të dyshuar të drogës, janë dy shtetas ukrainas. Mediat greke raportuan dje se në velierë ndodheshin 1 ton e 65 kilogramë e 750 gramë marijuanë, ndërsa kishte si destinacion Turqinë, ku do të shkëmbehej me heroinë të pastër. Ndërkohë, Policia ka arrestuar dy persona nga Ukraina, 28 dhe 42 vjeç, të cilët ndodheshin në velierën e mbushur me drogë. Nga ana e saj, Policia greke po heton nëse kapja e mjetit lundrues ka lidhje me ngjarjen e 4 majit në Sivota, Igumenicë, ku një tjetër velierë, e quajtur "My Melody", u dyshua për trafik të paligjshëm, por drejtuesi shtoi shpejtësinë dhe më pas i vuri zjarrin anijes, prej ku dy marinarë tentuan të largohen me një mjet ndihmës, ndërsa pronari i saj nuk është gjetur ende. Sipas mediave greke, veliera me emrin "My Dream" ka qenë në gjirin e Sarandës disa kohë më parë për t'u furnizuar me karburant.
POLICIA SHQIPTARE
Në lidhje me lajmin e publikuar në disa media greke se mjeti lundrues që u kap në Peloponez me një sasi hashashi, dyshohet se kishte ardhur nga Shqipëria, ka reaguar edhe Policia shqiptare, duke dhënë disa detaje rreth këtij operacioni. Policia e Shtetit tha dje se, në kuadër të bashkëpunimit me homologët për të parandaluar dhe luftuar trafikun e lëndëve narkotike, duke shkëmbyer informacion në kohë reale apo duke zhvilluar operacione të përbashkëta, menjëherë pas kapjes nga autoritet greke të mjetit lundrues është vënë në dijeni nga homologët, për të dhënat e mjetit dhe personat në bord, me qëllim verifikimin e tyre. Të ndaluarit janë shtetas ukrainas. Policia shqiptare thotë se nga verifikimi i bërë në regjistrat e Pikës së Kalimit Kufitar Sarandë, Himarë, Vlorë, Porti i Jahteve Orikum dhe QNOD, për disa muaj, mjeti lundrues, velieria "My Dream", i kapur me drogë, dhe dy personat ukrainas në bord, nuk kanë hyrje- dalje në Shqipëri. "Njëkohësisht, gjatë kësaj periudhe, nuk është konstatuar as nga QNOD e as nga Policia Kufitare asnjë rast i dyshimtë, i ndonjë mjeti lundrues që të ketë lundruar në drejtim të Greqisë apo të vendeve të tjera fqinje. Policia Kufitare shkëmben në vijimësi informacion me homologët, me qëllim parandalimin dhe goditjen e rasteve të trafikimit të lëndëve narkotike nëpërmjet kufijve", tha zyrtarisht Policia e Shtetit. Ndërsa sqaroi faktin se më 15 gusht, në Sarandë, ka hyrë një mjet lundrues, jaht, me emrin "Dream", me 3 shtetas turq në bord, të cilët kanë kryer proceduara të rregullta hyrje- dalje dhe mjeti është kontrolluar konform rregullave nga Policia Kufitare. Ky mjet nuk ka asnjë lidhje me mjetin lundrues të kapur me drogë në Greqi.