Turisti çek bie në përrua me motor, Policia arrin ta shpëtojë

Një incident që fatmirësisht u mbyll pa pasoja ka ndodhur dje me një grup turistësh çekë, që po eksploronin zonën malore që ndodhet mes fshatrave të Librazhdit dhe Tiranës. Ngjarja ka ndodhur rreth orës 19: 00, në një rrugë malore që ndodhet mbi fshatin Rinas të Librazhdit, që lidhet me fshatin Shëngjergj të Tiranës. Turistët nga Çekia kanë qenë duke lëvizur me motoçikleta dhe njëri prej tyre, një 53vjeçar me iniciale R. K., ka humbur kontrollin dhe ka dalë nga rruga. Për pasojë, ai ka rënë në përroin e Cirovës, duke pësuar fraktura në disa pjesë të trupit, por fatmirësisht jashtë rrezikut për jetën. Turistët e tjerë që ndodheshin me të në momentin e incidentit, i kanë telefonuar Policisë në Sallën Operative. Njoftimi është marrë fillimisht nga Policia e Librazhdit që ka nisur menjëherë patrullat dhe ambulancën drejt vendit ku ishte dhënë njoftimi. Por, për të bërë të mundur nxjerrjen e të plagosurit nga vendi ku kishte rënë, është dashur ndërhyrja me helikopter, që është nisur menjëherë pas komunikimit që Policia e Shtetit ka pasur me Ministrinë e Shëndetësisë. “Policia e Shtetit dhe Ministria e Shëndetësisë, në ndihmë të turistit çek. Transportohet në kohë reale me helikopter, turisti çek që u rrëzua me motoçikletë në përroin e Cirovës, në zonën malore të fshatit Rinas të Librazhdit. Rreth orës 19: 00, një grup turistësh çekë po përshkonin me motor rrugën malore mbi fshatin Rinas të Librazhdit, që lidhet me Shëngjergjin. Njëri prej tyre, shtetasi R. K, 53 vjeç, ka humbur kontrollin e motoçikletës dhe ka dalë nga rruga, duke rënë në përroin e Cirovës. Turistët kanë njoftuar në numrin 112, Sallën operative të Librazhdit dhe menjëherë në drejtim të tyre është nisur një patrullë policie dhe autoambulanca. Si pasojë e terrenit të vështirë, transportimi me autoambulancë ishte i pamundur dhe në këto kushte, Drejtoria e Përgjithshme e Policisë së Shtetit ka komunikuar me Ministrinë e Shëndetësisë për të dërguar një helikopter. Helikopteri i shëndetësisë është nisur menjëherë në drejtim të vendit të ngjarjes, duke bërë të mundur transportimin në kohë për në Spitalin Ushtarak të shtetasit çek, i cili kishte pësuar fraktura në trup, jashtë rrezikut për jetën”, njoftoi dje zyrtarisht Policia e Shtetit. Ambasada çeke në Tiranë dhe grupi i turistëve kanë falënderuar Policinë e Shtetit dhe Ministrinë e Shëndetësisë për reagimin në kohë, duke i shpëtuar jetën turistit 53- vjeçar.