PD: Rama duhet ta shkarkonte Etilda Gjonajn
"Shpenzoi 700 euro për një natë fjetje në hotel"
Partia Demokratike vijoi dje akuzat ndaj ministres së Drejtësisë, Etilda Gjonaj, mbi paratë që ka shpenzuar në udhëtimet zyrtare jashtë vendit. Ish- deputetja, Oriola Pampuri, në një deklaratë nga selia blu theksoi se ministrja duhet të ishte shkarkuar, për shumat e mëdha të parave që ka shpenzuar. "Në një vend normal, ku Kryeministri nuk ka prioritet të vjedhë popullin e të pasurohet për vete, ministrja e Drejtësisë, Etilda Gjonaj, duhet të ishte shkarkuar sot. Media zbuloi se ministrja e vendit më të varfër të Europës, ka firmosur fatura hoteli 700 euro nata. Ky është shpërdorim skandaloz i taksave të qytetarëve më të varfër të Europës për jetën luksoze të ministres së Edi Ramës në hotele me 5 yje. Ministrja duhet të ishte shkarkuar sot, edhe sepse ajo gënjeu publikisht, duke deklaruar se faturat e shtrenjta ishin për delegacionin. Faturat që ministrja ka paguar, janë të shkruara e bardha mbi të zezë. Janë të gjitha për vetëm 1 person, për vetëm 1 dhomë, me emrin e Etilda Gjonajt", theksoi ish- deputetja demokratike. Në vijim të akuzave, Pampuri theksoi se janë shumë eksponentë të kabinetit qeverisës që kanë abuzuar me fondet. "Në këtë shpërdorim dhe jetë luksi me paratë e shqiptarëve, Etilda Gjonaj nuk është e vetme. Morali për të vjedhur bashkë dhe në mënyrë të babëzitur shqiptarët, është arsyeja pse Edi Rama nuk e ka shkarkuar akoma Etilda Gjonajn dhe pse ne nuk jemi një vend normal, si çdo vend tjetër europian. Edi Rama hesht, sepse ky abuzim me paratë e shqiptarëve, është standardi i qeverisjes së tij. Ai vetë është grabitësi kryesor i parave dhe pasurive publike, bashkë me ministrat e tij, një grusht oligarkësh dhe kriminelësh. Kjo e keqe i ka rrënjët te vjedhja e votave të shqiptarëve, prandaj nuk ka asgjë më urgjente për Shqipërinë, sesa shkulja e së keqes - largimi i Edi Ramës, duke marrë me vete etildat, belindat, taulantët, erjonët, valdrinët dhe kajmakët e tij dhe duke i hapur rrugë shndërrimit të Shqipërisë në një vend normal, ku qeveria, e dalë nga zgjedhjet e lira e të ndershme, punon për njerëzit, jo për vete", përfundoi deklaratën ish- deputetja demokrate.