Thaçi vendosi datën 6 tetor për zgjedhjet e jashtëzakonshme në Kosovë
LDK ZGJEDH KANDIDATEN PËR KRYEMINISTËR
Kryesia e Lidhjes Demokratike të Kosovës ka vendosur të nominojë Vjosa Osmanin për Kryeministre, pas një debati brenda partisë. Kreu i LDK- së, Isa Mustafa, në konferencën për media tha se mes Lutfi Hazirit dhe Vjosa Osmanit, është vendosur për këtë të fundit. “Nuk kemi parë asnjë dallim se kush ka merita më shumë, por me propozimin e z. Haziri, kandidate për Kryeministre do të jetë Vjosa Osmani”, tha ai.
Presidenti i Kosovës, Hashim Thaçi të hënën ka dekretuar shpërndarjen e Legjislaturës së gjashtë të Kuvendit të Republikës së Kosovës dhe pas takimeve me përfaqësuesit e partive, po të hënën ka vendosur edhe datën e mbajtjes së zgjedhjeve të jashtëzakonshme. “Sot e dekretova shpërndarjen e Legjislaturës VI të Kuvendit të Republikës së Kosovës. Pas konsultimeve me partitë politike, në përputhje me kompetencat e mia kushtetuese, do të vendos së shpejti për datën e zgjedhjeve të përgjithshme të parakohshme”, ka shkruar Thaçi në “Facebook” para takimeve me subjektet politike. Por me sa duket, bisedimet kanë shkuar mbarë dhe që të gjithë kanë gjetur mirëkuptim për datën më të mirë të mbajtjes së zgjedhjeve në Kosovë. Presidenti Hashim Thaçi, po të hënën mori vendimin për shpalljen e zgjedhjeve të parakohshme për Kuvendin e Republikës së Kosovës duke caktuar ditën e diel, 6 tetor 2019, si data për mbajtjen e zgjedhjeve. Në vendimin e nënshkruar thuhet se “duke u bazuar në përgjegjësitë kushtetuese dhe ligjore, presidenti Thaçi ka marrë vendim që zgjedhjet e parakohshme për Kuvendin e Republikës së Kosovës të mbahen më 06 tetor 2019”. Zyra e Presidentit të Kosovës ka udhëzuar Komisionin Qendror të Zgjedhjeve të Republikës së Kosovës, që të ndërmarrë të gjitha veprimet e nevojshme për organizimin dhe mbajtjen e zgjedhjeve, në përputhje me legjislacionin në fuqi. Por ditën e shpërndarjes së Kuvendit t Kosovës, një zëdhënës nga KQZ- ja e Kosovës tha se institucioni nuk ka mjete financiare të mjaftueshme për organizimin e këtyre zgjedhjeve. Kjo do të thotë se zgjedhjet e reja do të jenë një tjetër barrë ekonomike për Kosovën. Presidenti Thaçi ka preferuar mandatimin e një kandidati tjetër për Kryeministër, por të gjitha partitë politike ishin për zgjedhje të reja .