Trump: Në G7 e ardhshme do ta ftoj patjetër Putinin
Trump shmangu seancën për klimën: S’do humb pasuri për mullinj ere
Presidenti i SHBA, Donald Trump, ka sugjeruar se ai do të ftojë patjetër Presidentin e Rusisë, Vladimir Putin, në samitin e ardhshëm të G7, i cili do të mbahet në SHBA.
Trump ka përmendur se nuk ka një vend më të përshtatshëm për të mbajtur një samit të tillë, sesa resorti i golfit në pronësinë e tij, “National Doral Miami Golf Resort”, në Florida. Edhe pse kjo do të mund të konsiderohej si një shkelje e etikës kushtetuese, pasi Presidenti nuk mund të përfitojë personalisht nga pozicionit i tij në krye të SHBA, Trump tha se ai nuk do të përfitonte asgjë nga mbajtja e këtij samiti në resort, ndryshe nga analizat në disa media amerikane mbi këtë çështje.
Presidenti amerikan, i cili edhe në samitin e fundit të G7 që u mbajt në Francë ka përsëritur disa herë se do të ishte mirë që të ishte ftuar edhe Rusia, tha se ka gjasa që kjo të ndodhë në samitin e ardhshëm, i cili do të organizohet prej tij. Trump sugjeroi se Putin mundej që “psikologjikisht” të mos donte të merrte pjesë, pasi Rusia ishte dëbuar nga grupi, dikur G8, pas aneksimit të Krimesë. Por edhe për këtë pikë ka mbrojtur qëndrimin e rusëve. Ai tha se ishte faji i pararendësit të tij në Presidencë, Barak Obamës, që Rusia ishte lejuar të aneksonte Krimenë. Trump tha se nuk i “bëhet vonë” nëse afrimi i Rusisë në G7 e dëmton atë politikisht. “Nuk e bëj këtë për arsye politike”, tha ai duke shpjeguar më pas se e bënte këtë për të mirën e Amerikës, pasi do të ishte më mirë që Rusia të ishte “brenda tendës, sesa jashtë saj” si një fuqi ekonomike.
Në samitin e fundit, Trump ka evituar pjesëmarrjen në një seancë të dedikuar për ndryshimet klimatike, duke shkruar se kishte konflikte me agjendën. Por mungesa e pjesëmarrjes së tij besohet se ka shumë më tepër lidhje me qëndrimin e izoluar që ka Presidenti amerikan në lidhje me rrezikun e klimës nga industrializimi. Ndërsa liderët e tjerë ishin të pranishëm, karrigia e Trump ishte bosh në këtë seancë. Por ai ka folur në një konferencë për mediat. I pyetur për krizën e klimës, ai tha se e cilëson veten si ambientalist, se e do ajrin dhe ujin më të pastër, por gjithashtu dëshiron që SHBA ta ruajë pasurinë e saj të madhe. “Unë e kam gjallëruar atë pasuri. Dhe nuk do ta humbas atë. Nuk do ta humbas për ëndrra, mullinj ere, që sinqerisht nuk po funksionojnë shumë mirë”.
Qeveria Franceze, organizatorja e samitit të G7 të këtij viti, ka lëshuar një dokument pas përfundimit të punimeve në emër të drejtuesve të shtatë vendeve në këtë takim: Franca, Gjermania, Italia, Japonia, Kanadaja, SHBA, Mbretëria e Bashkuar. Dokumenti nuk përfshin diskutimet mbi Amazonën dhe ndryshimin e klimës, dhe përqendrohet në tregtinë, Iranin, Ukrainën, Libinë dhe Hong Kongun. “Drejtuesit e G7 dëshirojnë të theksojnë unitetin e tyre të madh dhe frymën pozitive të debateve të tyre”, thuhet në dokument. Presidenti francez, Emmanuel Macron, tha se ka pasur shumë tensione dhe shumë konflikte këtë vit në samitin e G7. Ai shtoi se bie dakord me Trump në lidhje me faktin se Irani nuk duhet të ketë armë bërthamore dhe se shpreson që SHBA- ja dhe Kina të arrijnë sa më shpejt një marrëveshje tregtie, pasi paqartësitë ekonomike janë të dëmshme për të gjithë ekonominë botërore.