Mediu: Heshtja e Ramës për Kajmakun është kriminale
Idrizi: Strategji për kriminalizimin e politikës dhe largimin e shqiptarëve
Aleatët e Partisë Demokratike akuzuan Kryeministrin Rama se ka qenë ai që ka sjellë në politikën shqiptare njerëz me rekorde kriminale. Partia Republikane e cilësoi “kriminale” heshtjen e Kryeministrit Rama, pasi PD- ja publikoi dje dokumentet e autoriteteve greke ku vërtetohet, sipas saj, akuza për falsifikim parash ndaj kreut të Bashkisë së Vorës, Agim Kajmakut. Në reagimin e saj, Partia Republikane thotë se Rama nuk i ofron shqiptarëve standarde europiane dhe se vitet e qeverisjes së tij “kanë provuar shkatërrimin e shtetit dhe shoqërisë”. “Rama dhe të besuarit e tij kanë qenë në dijeni të plotë që kandidati i Vorës, Agim Kajmaku, ka çështje penale në Greqi. Heshtja e tij mbasi opozita ka bërë publike fakte dhe të dhëna zyrtare nga Greqia është po kaq kriminale, për më tepër përpjekjet që po bëhen për të mashtruar publikun. Edi Rama dhunoi kushtetutën në 30 qershor, përdhunoi KQZ- në duke e kthyer në vegël politike, shkatërroi paanësinë e çdo institucioni të administrimit të zgjedhjeve dhe zëvendësoi njerëzit politik të PS- së me përfaqësues të krimit. Këto vite të qeverisjes së Ramës kanë provuar shkatërrimin e shtetit dhe shoqërisë; në mënyrë të qëllimshme ai ka bërë çdo gjë të mundshme për zëvendësimin e shtetit me antishtetin, të ligjit me krimin, të së drejtës me të padrejtën, të moralshmes me të pamoralshmen”, thuhet në reagimin e Partisë Republikane. Kreu i PDIUsë, Shpëtim Idrizi, akuzoi Kryeministrin se ka një strategji për kriminalizimin e politikës dhe rënies së besimit të qytetarëve tek ajo. “Asnjë përgjegjësi personale të personave në fjalë nuk mundet të justifikojë përzgjedhjet recidiviste të kryetarit të Rilindjes dhe Kryeministrit të vendit, i cili po thellon një dukuri problematike për shoqërinë shqiptare, atë të rritjes dhe dhënies së mundësisë së vendimmarrjes, e më pas fshehjes të së kaluarës të personave me precedentë kriminalë. Rasti i kryetarit të Bashkisë së Vorës, Agim Kajmaku ( Jorgo Toto), me sa duket nuk është as i pari, po as i fundit. Ai është vetëm treguesi faktik i një strategjie për kriminalizimin e politikës, zhvlerësimit dhe depersonalizimit të çdo institucioni të shtetit, që ka sjellë dhe humbjen e besimit dhe shpresës së shqiptarëve”, thuhet në reagimin e kreut të PDIUsë. Sipas tij, vetëm zgjedhjet e parakohshme do të normalizonin jetën politike në vend. “PDIU kërkon që institucionet e drejtësisë që nënshtrohen e fyhen në telefona nga kryetari i Rilindjes, të ngrihen në nivelin e respektit të vetes e të kryejnë detyrën minimale për të dërguar abuzuesit përpara drejtësisë. Vetëm zgjedhjet e lira dhe të ndershme pa garantuesit e krimit në pozita pushtetmbajtëse, zgjedhje të përgjithshme dhe lokale bashkë, do mund t’i hapin rrugën normalizimit të jetës politike dhe rivënien e standardeve të demokracisë në vend”, shprehet Idrizi.