Lila te Tirana, Kukësi del huq
Marrëveshje për një vit, do marrë afro 10 mijë euro në muaj
Andi Lila është zyrtarisht futbollist i Tiranës. Vetëm 5 ditë nga mbyllja e afatit të transferimeve, mbrojtësi kavajas ka zgjedhur të luajë për bardheblutë.
Dikur ish- kapiten i kësaj skuadre dhe një beniamin i tifozërisë kryeqytetase, 33vjeçari ka vendosur të rikthehet në klubin ku edhe mori përmasat e një futbollisti të Kombëtares. Për tre sezone ( 2008- 2011). Ai luajti 78 ndeshje me Tiranën dhe shënoi 11 gola. Për një pjesë të mirë të kohës, aty u gradua edhe kapiten i skuadrës, duke u shndërruar në një protagonist të padiskutueshëm, aq sa më pas u transferua në kampionatin grek te PAS Janina.
BLOFI ME KUKËSIN
Tri ditë më parë, Andi Lila pothuajse ishte një lojtar i Kukësit. Ai pati drekuar së bashku me presidentin e nënkampionëve dhe arritën një marrëveshje paraprake. Duke pritur vetëm zyrtarizimin, dje erdhi kthesa e papritur, që irritoi jo pak fansat e Kukësit, që menduan se skuadra do të mund të kompletohej me një lojtar të rëndësishëm. E kaluara te Tirana, investimet e rëndësishme që ka bërë Halili, por edhe një miqësi e hershme me këtë të fundit, e bindën Lilën që të zgjidhte bardheblutë.
KRYETAR I SHOQATËS
Andi Lila prej pak javësh është zgjedhur kryetar i shoqatës së futbollistëve. Mbrojtësi mori votat e kolegëve të tij dhe pritet të jetë një zë që do t'i dëgjohet fjala në të ardhmen. Ndërkaq, do të jetë edhe një "xhol" në dispozicion të Memës, sapo ai të ketë fituar formën e duhur fizike. Lila mund të luajë në disa role dhe kjo do ta ndihmonte shumë Tiranën në të ardhmen. Disa muaj më parë, ai iu nënshtrua një ndërhyrjeje kirurgjikale në ligamentet e gjurit dhe ende nuk ka mundur të nisë as stërvitje individuale. Ndërkaq, mësohet se lojtari ka nënshkruar për një vit me Tiranën, me opsion për të rinovuar edhe një sezon tjetër. Paga e tij mujore do të jetë afërsisht 10 mijë euro në muaj.