“S’e dija për pengmarrjen”, Gjykata lë në burg të arrestuarin si bashkëpunëtor
Prej 23 gushtit, Prokuroria kishte nën përgjim personat e implikuar. Pana: Të afërmit e mi më kërkuan të merrja një porosi
Gjykata për Krime të Rënda caktoi masën e sigurisë "Arrest në burg" për të riun që u arrestua si i përfshirë në pengmarrjen në Greqi.
Leandro Pana mohoi të kishte dijeni për çfarë po ndodhte në shtetin fqinj, ndërsa është shprehur se kanë qenë të afërmit e tij, që i kanë kërkuar të merrnte një porosi nga një person, të cilin shkoi dy herë për ta takuar dhe nuk e kishte takuar asnjëherë. Arrestimi i të riut erdhi menjëherë pas dështimit të takimit të fundit, ndërsa në Prokurori ka bërë kallëzim vëllai i personit që është marrë peng në Korinthos të Greqisë, nga 4 persona. Njëkohësisht me bisedimet për të dorëzuar shumën prej 10 mijë euro Panës, Nexhat Tarellari, vëllai i Jetnorit, u ka kërkuar ndihmë autoriteteve që kanë shënuar procedimin penal për rastin. Akuza, e përfaqësuar nga prokurori Besim Hajdarmataj, pretendoi se ka përgjime telefonike ku i riu rezulton të kontaktojë me persona të tjerë të lidhur me ngjarjen. Avokati i Panës gjatë seancës mohoi akuzat dhe kërkoi nga Gjykata që të caktojë një masë më të lehtë sigurie për të.
DËSHMIA "Të afërmit e mi në Greqi më kanë kontaktuar dhe më kërkuan të merrja një shumë te një person. Kam folur me këtë person dhe kemi lënë një takim në Shkozë, por, pasi e prita, ky person nuk erdhi. Më pas kontaktuam sërish dhe kemi lënë një takim tjetër pranë QSUT- së, por edhe aty nuk erdhi dhe unë jam larguar për në një dasmë. Rrugës më kanë arrestuar. Unë nuk kam pasur dijeni për çfarë po ndodhte", ka thënë Leandro Pana.
HETIMET Mbrëmjen e së premtes, Policia greke, pas informacioneve të përcjella nga Policia e Tiranës, nëpërmjet Interpol Tiranës, për adresën e saktë ku mbahej peng i riu shqiptar, ka bërë të mundur lirimin e tij. Ndërsa paralelisht me operacionin për lirimin e pengut, Policia ka bërë të mundur edhe arrestimin e 4 autorëve të dyshuar në Greqi, ndërsa bashkëpunëtori i tyre është arrestuar në Tiranë. Ky i fundit ishte personi që komunikonte me bashkëpunëtorët e tij për të hyrë në kontakt me vëllain e pengut. Për lirimin e tij, ata do t'i kërkonin vëllait të 31- vjeçarit shumën prej 10 mijë eurosh. Por kanë qenë pikërisht komunikimet telefonike mes autorëve në Greqi dhe 24vjeçarit, i cili qëndronte në Shqipëri, që bënë të mundur zbulimin e vendndodhjes së autorëve të ngjarjes. Policia e Shtetit tha zyrtarisht se të arrestuarit janë shtetasit me iniciale Xh. N., 49 vjeç, që është ideatori i pengmarrjes; H. M., 35 vjeçe, e dashura e personit që u mor peng; B. M., 41 vjeç, dhe M. M., 19 vjeç, të gjithë banues në Tiranë. Këta të katërt u arrestuan në Greqi. Ndërsa Policia e Tiranës arrestoi këtu shtetasin me iniciale L. P., 24 vjeç, bashkëpunëtor i tyre.