OPERACIONI "KORINTHOS", SI U ARRESTUAN PENGMARRËSIT
Operacion policor ndërkombëtar i koduar "Korinthos" u zhvillua mes Policisë së Tiranës, Prokurorisë së Krimeve të Rënda, Departamentit të Policisë Kriminale dhe Policisë greke, me ndërmjetësimin e Interpol Tirana. Pas hetimeve paraprake për një kallëzim për pengmarrje dhe kanosje, u bë e mundur të zbardhej rasti për një shtetas që mbahej në shtetin grek. Nga operacioni u arrestuan 5 shtetas të dyshuar si autorë të pengmarrjes së të riut Jetnor Tarellari nga Tirana. "Pas një hetimi disaditor, duke përdorur metodat speciale të hetimit, Sektori i Krimeve të Rënda ndaj Jetës dhe Pronës në Drejtorinë Vendore të Policisë Tiranë, në bashkëpunim me Prokurorinë pranë Gjykatës së Shkallës së Parë për Krime të Rënda Tiranë dhe Policinë greke, me ndërmjetësimin e Interpol Tirana, finalizoi me sukses operacionin policor ndërkombëtar "Korinthos". Policia e Tiranës, falë informacionit të grumbulluar për vendndodhjen e saktë të autorëve dhe vendit ku mbahej peng shtetasi J. T., i ka dhënë nëpërmjet Interpol Tiranës, Policisë greke, informacion të saktë në kohë reale mbi vendndodhjen ( adresën e banimit) të personit të marrë peng dhe pengmarrësve", njoftoi Policia.