Marijuanë drejt Greqisë, përfundon keq aventura e 3 të rinjve nga Saranda
SARANDE - Aventura e tre të rinjve nga Saranda për të trafikuar një sasi prej 3 kg marijuanë drejt Greqisë përmes kufirit jeshil, ka përfunduar me arrestimin e tyre. Të rinjtë u kapën me 3 kg marijuanë, ndërsa në pranga nga Policia greke ka përfunduar dhe personi që po priste lëndën narkotike përtej kufirit mes dy vendeve. Nuri Shero, 21 vjeç, nga Shalësi, Alket Avdi, nga Dishati, 22 vjeç dhe Andrea Sadiku, 19 vjeç, nga Shëndëlliu, që të tre banorë të Bashkisë Konispol, janë të arrestuarit nga Policia shqiptare, ndërsa në Igumenicë u kap shtetasi grek me inicialet G. M., 23 vjeç. Ky i fundit u zbulua nga telefonatat që ishin kryer përmes një prej celularëve që iu sekuestruan tre të rinjve të arrestuar. "Si rezultat i operacionit u bë e mundur kapja në kufirin jeshil, në Qafë Botë, e dy shtetasve shqiptarë në tentativë për të trafikuar në drejtim të shtetit grek 3 kg Cannabis Sativa. Po gjatë operacionit, specialistët për Hetimin e Narkotikëve, si rezultat i veprimeve të shpejta hetimore, identifikuan dhe kapën edhe një person tjetër si bashkëpunëtor në këtë trafik. Në vijim të operacionit, Policia Kufitare e Qafë Botës ka mundur të marrë informacion se një shtetas grek së bashku me automjetin e tij në afërsi të Pikës Kufitare greke Mavromat ishte duke pritur lëndën narkotike, që po transportohej nga dy shtetasit shqiptarë. Menjëherë nëpërmjet pikës së kontaktit është njoftuar Policia e Igumenicës, e cila ka bërë të mundur kapjen e shtetasit grek G. M., 23 vjeç, banues ne Sivota, Bashkia Igumenicë, bashkë me mjetin e tij tip ' Smart'. Nga kontrolli i kryer në banesën e shtetasit grek, Policia greke gjeti 1.5 kg lëndë narkotike Cannabis Sativa", bën të ditur Policia. Ndërkohë, raportohet se Policia greke ka vijuar operacionin, duke arrestuar dhe një tjetër shqiptar, bashkëpunëtor të bandës, identiteti i të cilit nuk bëhet i ditur, si dhe një 54- vjeçar grek. Gjithashtu, është kontrolluar për herë të dytë banesa e grekut, në të cilën janë gjetur tri armë gjahu pa leje. Kontrollit nuk i ka shpëtuar as banesa e 24- vjeçarit shqiptar, në të cilën janë gjetur 5.6 gramë kanabis, bashkë me një grirëse.