Fituesit e parë në universitete, dekanët sqarojnë procedurën

Të rinjtë që e gjetën veten në listat e fituesve të publikuar një ditë më parë, kanë pesë ditë afat për të bërë zgjedhjen e tyre përfundimtare. Ndërsa të tjerët duhet të monitorojnë lëvizjen e vijës së kuqe pas çdo faze, për të bërë në fund zgjedhjen e duhur. Me këtë apel dolën dje në deklaratë për mediat katër dekanë të Universitetit të Tiranës. Nën presionin e ikjes së nxënësve shumë të mirë, të cilët detyrohen të regjistrohen në një degë më pak të preferuar me frikën e mosshpalljes fitues, dekanët apelojnë që ata të mos dekurajohen edhe në rast se nuk e shohin emrin që në krye të herës. “Nga 31 deri në 1 shtator shpallen rezultatet e aplikimeve. Raundi i parë fillon më 2 shtator deri në 15 shtator. Ka 7 faza 48- orëshe, të mos shqetësohen nëse nuk e shohin veten fitues në fazën e parë apo të dytë. Shpërndarja e më të mirëve do të bëjë që të vijë radha në fazat e tjera”, deklaroi dekani i Fakultetit Ekonomik, Dhori Kule, ndërsa dekani i Drejtësisë, Artan Hoxha, sugjeron monitorimin e vijës që ndan fituesit nga humbësit. “Nuk duhet të ketë pesimizëm për ata që nuk dalin fitues në raundin e parë apo fazat e para. Duhet të kenë vëmendje, të shikojnë se si është trendi, si ulet viza e kuqe dhe mesatarja e shpallur për secilin fakultet”. Katër Fakultetet në fjalë, Ekonomiku, Drejtësia, Histori- Filologjia dhe Gjuhët e Huaja e kanë derën e hapur për ankimime për të pakënaqurit, gjë që mund të bëhet përpara se listat me ID fituese të hidhen në portalin zyrtar u- albania. “Në qoftë se ndonjë prej tyre konfirmon se ka pasaktësi, ka të drejtën e ankimimit në fakultetet tona deri në datën 30 gusht”, sqaroi Kule, teksa ndan me opinionin publik edhe shifrat e atyre që synuan këtë vit fakultetin që drejton. Ekonomiku nuk ka njohur ulje të numrit të atyre që e lakmojnë, ndonëse numri i maturantëve që aplikuan në universitete është më i ulët se vitet e kaluara. Në Fakultetin Ekonomik, këtë vit, sipas dekanit janë 21 523 aplikime, 1200 aplikime më shumë se një vit më parë. Sa i takon kostos së një viti shkollor, Dhori Kule është një tjetër zë që konfirmon se studentët e rinj do të trajtohen me subvencionim tarife edhe këtë vit. “Qeveria ka deklaruar se do të vazhdojë të njëjtën politikë me tarifat. Pra, do të subvencionojë gjysmën. Senati akademik ka bërë detyrën që i takon. Pjesa tjetër i takon qeverisë, e cila ka konfirmuar se do të vazhdojë”, bëri me dije dekani. Viti i ri akademik vjen me risi. Grupe të caktuara në Fakultetin e Ekonomisë do të mësojnë me literaturë në gjuhën angleze, ndërsa në degët e edukimit, filtri i ri i mesatares ka shtuar përgjegjësinë te pedagogët për formimin e mësuesve të rinj.