Tirana, fitorja mbetet “e varur” në traversë

Polemika për një gol "fantazmë", goditet anësori Doda

Tirana dhe Teuta ngritën dje siparin e javës së dytë të kampionatit dhe 90- minutëshi i parë, ku dy skuadrat kishin fituar, tregoi se bardheblutë dhe durrsakët janë akoma të pa kolauduar.

Një ndeshje që i pati të gjitha, përveç golit. 126 minuta ndanë vërshëllimën e parë të gjyqtarit Eldorjan Hamiti me atë të fundit, që sinjalizoi përfundimin e takimit në shifrat 0- 0. 37 minuta zgjati ndërprerja e takimit në pjesën e parë, për shkak të problemeve në sistemin e ndriçimit të stadiumit "Selman Stërmasi". 2 ishin traversat që i erdhën në ndihmë Teutës, por që ndalën Tiranën të gjejë golin. Tetë kartonë të verdhë të dhënë e ndonjë i falur, plus Emiljano Vilës iu kursye kartoni i kuq në minutën e gjashtë, ishin pjesë e kësaj sfide. Prania e tifozëve i dha bukuri takimit, pasi në Superiore jemi mësuar të shikojmë stadiume bosh, por edhe ata e njollosën në fund, duke goditur me shishe në dy raste anësorin Ergin Doda, që sollën edhe ndërprerje të shkurtër. Ekipet i patën mundësitë për të shënuar, por finalizimi çaloi, aq më shumë që skuadrat vuajtën në pasimin e fundit. Tirana e Teuta u kujtuan në 15 minutat e fundit se duhej shënuar, pasi ishin më agresivë. Provizorisht, Tirana dhe Teuta kryesojnë me nga katër pikë. Pjesa e parë - Të dyja ekipet vinin në këtë ndeshje me qëllimin për t'u konfirmuar si pretendentë, gjë e cila arrihej duke fituar. Sfida nisi me ndryshime të vogla, ku te Tirana mungonin Torasa i dëmtuar, i zëvendësuar nga Kobina, si dhe Dunga që e nisi nga stoli dhe në vend të tij u preferua Majkëll Ngo. Te durrsakët, risia ishte Emiljano Vila titullar, që kishte ulur në stol Lorenco Vilën. Takimi nisi me Tiranën në sulm, por pa gjetur rrugën e golit. Teuta vuan në start dhe duket se shpresat e golit i ka të varura te goditjet standarde. Në momentin kur loja kishte marrë ritëm, pasi edhe Teuta e ngriti nivelin, në minutën e 22- të, një nga kullat e sistemit të ndriçimit pëson defekt, pikërisht kur Tirana do të gjuante një goditje dënimi pranë portës mike. U deshën rreth 37 minuta pritje që loja të niste dhe Tirana ka rast të volitshëm, ku pati edhe dyshime për një gol fantazmë dhe më pas gjuajtja e Ngosë ndalet nga traversa. Ndërprerja duket se kishte ndikuar te lojtarët, që pas këtij momenti iu desh kohë të gjenin marrshin e duhur. Bllokimi që dy ekipet i bënin njëratjetrës në mesfushë, nisja e aksioneve me topa të gjatë dhe mungesa e pasimit final, bënë që pjesa e parë të mbyllet me rrejta të paprekura.

Pjesa e dytë - Ndeshja rifillon me të njëjtët lojtarë në fushë, por është Teuta që e ka vështrimin më shumë te porta dhe me anë të goditjeve nga këndi, apo në pozicione standarde sjell panik në mbrojtjen bardheblu. Pas 7 minutash lojë, trajnerët nisin rifresikimin e skuadrës. Trajneri Shkëmbi bën një ndryshim të detyruar, ku Kallaku i dëmtuar ia lë vendin Gashit, ndërsa te Tirana, Kobina dhe Halili ndërrohen me Çelhakën dhe Kërçikun. Në të 63ën, Emiljano Vila ia lë vendin Lorenco Vilës. Përpos rifreskimeve, loja mbetet në mesfushë dhe goditjet standarde janë rreziku kryesor. Në minutën e 69- të, trajneri Mema largon nga fusha Ngonë, i cili shfryn kur ulet në stol, dhe në vend të tij hyri Dunga, i cili në minutat që pati në dispozicion, nuk dha asgjë. Në minutën e 81- të te Teuta është momenti i debutimit të 18- vjeçarit Ledio Beqja, që hyn në vend të Vecajt. Pas minutës së 75- të, skuadrat kujtohen se duhet të sulmojnë, kryesisht Tirana që është më agresive, ndërsa Teuta i ka rastet e saj në shtesë. Në minutën e 85- të për herë të dytë shpëtimtare e portës durrsake bëhet trau i portës, ku kësaj radhe ndalin topin e gjuajtur me të majtën nga Edon Hasani. Përpos dëshirës që patën skuadrat për fitore, në fund, gjithçka u mbyll në shifrat 0- 0 në stadiumin "Selman Stërmasi".