Taksa e shtëpisë, 130 mijë pensionistët që përfitojnë
Zbardhet lista e dokumenteve dhe afatet për deklarimin e sipër faqes së shtëpisë tek Ujësjellësi. Kategoritë e pensionistëve që përfitojnë dhe si llogaritet detyrimi
Edhe nëse nuk paraqitesh për të vetëdeklaruar, nuk i shpëton dot taksës së re të banesës që do t’i shtohet faturës së ujit. Duke qenë se për Bashkinë e Tiranës, afati i fundit për dorëzimin e dokumenteve është data 15 shtator, në pikat e UKT- së janë krijuar radhë të gjata.
Drejtoria e Ujësjellës Kanalizimeve Tiranë ka njoftuar dje se për ato familje që nuk paraqiten për të deklaruar të dhënat e banesës do të aplikohen çmimet e referencës. Kjo do të thotë se për shtëpitë e pas vitit 1993 do të merret e mirëqenë sipërfaqja 100 metër katrorë, ndërsa për ato të ndërtuara para këtij viti 70 metër katrorë. Mbi bazën e kësaj sipërfaqeje do të llogaritet edhe taksa, e cila do të mblidhet bashkë me faturën e ujit. Por edhe për deklarimin e kryer do të mbahet përgjegjësi, kjo pasi pas kësaj faze do të nisë verifikimi në terren. “Në rast se vlera e vetëdeklaruar nga taksapaguesi rezulton e ndryshme nga vlera e llogaritur me çmimin e vlerësuar, të përcaktuar në metodologjinë e miratuar me VKM nr. 132, datë 07.03.2018, si vlerë e bazës së taksës do të merret vlera më e lartë”, thuhet në njoftim. Por. nga ky detyrim i ri, që me shumë gjasë do të nisë të aplikohet nga 1 janari i vitit që vjen, janë të përjashtuar pensionistët kryefamiljarë, të cilët nuk kanë të ardhura të tjera veç pensionit, si edhe ata që trajtohen me pension social. Qeveria ka lënë jashtë skemës së taksimit këtë kategori, e cila trajtohet edhe me kompensim pas heqjes së fashës së konsumit të energjisë elektrike deri në 300 kilovatë. Nga të dhënat e ISSH- së mësohet se janë rreth 130 mijë pensionistë, të cilët përfitojnë çdo muaj 648 lekë në formë rimbursimi për dritat, njëkohësisht nuk do të preken nga taksa e shtëpisë. Veç pensionistëve, nga ky detyrim “amnistohen” edhe familjet që trajtohen me ndihmë ekonomike, gjithashtu edhe komunitet fetare. LLOGARITJA
Taksa e banesës do të arkëtohet së bashku me faturën e ujit. Kjo do të thotë që në fund të çdo muaji, bashkë me vlerën e faturuar do të jetë edhe taksa e banesës, e cila llogaritet mbi bazën e sipërfaqes dhe çmimin e vlerësuar. “Baza e llogaritjes së taksës së ndërtesës është vlera e “ndërtesës” shumëzuar me shkallën në përqindje të taksës së miratuar me ligj për kategorinë e ndërtesave për banim, që është 0,05%”, thuhet në njoftimin e UKT- së. Konkretisht, për një apartament me sipërfaqe 70 m ² , taksa vjetore do të jetë 2100 lekë ( 70 m ² x çmim vlerësues 60,000 lekë/ m ² ) x 0,05% = 2 100 lekë/ vit”. Kjo do të thotë që në muaj, detyrimi do të jetë: 2 100 lekë ( Taksa Vjetore): 12 muaj = 175 lekë/ muaj. Pra, vlera e Taksës mbi Ndërtesën përfshirë në faturën mujore do të jetë 175 lekë. Për t’i dhënë mundësinë gjithsecilit të bëjë llogaritë mbi atë që i takon të paguajë, gazeta boton edhe tabelën me çmimet për metër katror sipas zonave. Taksa do të aplikohet jo vetëm për shtëpitë e banimit, por edhe për bizneset, bodrumet, si edhe garazhet. Sa i takon dokumenteve që duhet të dorëzohen për vetëdeklarimin, krahas kopjes së kartës së identitetit kërkohet dokumenti i pronësisë, si edhe libreza e ujit. Gjatë procesit të vetëdeklarimit kryhet edhe përllogaritja e taksës vjetore për ndërtesën.