PD: Janë dhjetëra individë me rekorde kriminale
“Rasti ‘ Kajmaku’ tregon krizën, në të cilën ndodhet Prokuroria”
Partia Demokratike theksoi dje se lista e zyrtarëve të lartë në bashkitë e vendit, që janë subjekt i ligjit të dekriminalizimit është edhe më e lartë. Kryetari i Partisë Demokratike, Lulzim Basha, akuzoi Ramën se po mbështet individ me të shkuar kriminale si edhe ka kandiduar për postin e kryetarëve të bashkive individ me rekorde kriminale. “Partia Demokratike po shqyrton të gjitha rastet, bëhet fjalë për dhjetëra individë me rekorde kriminale të garuar nga Edi Rama, të kandiduar nga Edi Rama, sigurisht nuk janë as kryebashkiakë, as këshilltarë, janë pjesë e një procesi antikushtetues. Por për të qëndruar te Jorgo Kajmaku dua të dënoj heshtjen e Edi Ramës. Ka 24 orë që Partia Demokratike ka publikuar dokumentet zyrtare që provojnë se Jorgo Kajmaku është në shkelje të Ligjit të Dekriminalizimit dhe sot duhet të ishte marrë si i pandehur nga Prokuroria. Dua po kështu të dënoj heshtjen e Prokurorisë, e cila si një shtojcë e pushtetit të Edi Ramës sa herë që i duhet Edi Ramës për propagandë, bën lëvizje propagandistike, por edhe ajo ka 24 orë që hesht”, theksoi Basha duke vijuar akuzat ndaj Prokurores së Përgjithshme të Përkohshme, Arta Marku. “Rekordet zyrtare që provojnë që Jorgo Kajmaku është një person me llogari të hapura me drejtësinë greke janë publikuar, kjo e bën atë automatikisht përgjegjës para drejtësisë shqiptare, para ligjit shqiptar e në veçanti para ligjit për Dekriminalizimin dhe Kodin Penal. Kanë 24 orë që heshtin. Heshtja e Edi Ramës dhe e Prokurorisë tregojnë fare qartë se Jorgo Kajmaku është kandiduar me dijeninë dhe bekimin e Edi Ramës, edhe kur ky i fundit kishte të njëjtat fakte dhe dinte të njëjtat të vërteta që sot i di çdo shqiptar, që ai ishte një person i cili sipas ligjit të dekriminalizimit nuk mund të kandidohej, jo vetëm kaq, por ishte një person i cili duhet dhe ka llogari të hapura tashmë jo vetëm me drejtësinë greke, por edhe me drejtësinë shqiptare. Tregon po kështu krizën e thellë në të cilën ndodhet Prokuroria shqiptare dhe paralizën e sistemit të drejtësisë.”