PER DRITAT DHE TAKSAT Marrin 1600 lekë në muaj, si rimbursohen pensionet
Zbardhen vendimet e qeverisë që çojnë deri në 1600 lekë në muaj kompensimin e pensionistëve për dritat e taksat. Tabela me pagesën e taksës e rimbursimet në Tiranë sipas zonave
Taksa që do të nisë të aplikohet për banesën, nuk do të jetë e njëjtë për të gjithë. Vlera e saj do të përcaktohet mbi bazën e sipërfaqes së banesës dhe çmimin e referencës.
Nisur nga tabela zyrtare me çmimet për çdo zonë kadastrale, për sipërfaqen 100 metër katrorë, taksa e re që do të rëndojë në xhepat e konsumatorëve shqiptarë varion nga 3000 lekë deri në 9500 lekë në vit. Duke qenë se nuk është fikse për të gjithë, ky detyrim i ri, që me shumë mundësi do të nisë janarin e vitit që vjen, do të llogaritet për çdo familje në momentin që bëhet dorëzimi i dokumenteve. Për drejtorinë e Ujësjellësit Tiranë, afati i limit për vetëdeklarimet është data 15 shtator.
PENSIONISTËT Megjithatë, për 130 mijë pensionistë në të gjithë vendin, që janë aktualisht në skemën e rimbursimit të dritave, nuk do të aplikohet asnjë taksë e re në faturën e ujit. Kjo pasi pensionistët kryefamiljarë, qofshin këta në fshat apo qytet, përfshirë edhe ata që trajtohen me pension social, janë të përjashtuar nga ky detyrim. Por sa është vlera që “amnistohet”? Konkretisht për një shtëpi 100 metër katrorë me çmim reference sipas Hipotekës mesatarisht 80 000 lekë, taksa e llogaritur është 4000 lekë në vit. Në këto kushte, detyrimi mujor që do t’i shtohej faturës, do të kishte qenë 330 lekë. Pra, një pensionist “kursen” mesatarisht 330 lekë çdo muaj. Por, krahas kësaj, kjo kategori përfiton edhe nga skema e rimbursimit të dritave, pas heqjes së fashës për konsum deri në 300 kilovatë orë. Vlera e kompensimit është 648 lekë, por kësaj shume i shtohen edhe disa kompensime të tjera të miratuara ndër vite, siç janë kompensimi për ndryshimin e çmimit të bukës, ai për energjinë etj., që e çojnë masën e përfitimit në total 1288 lekë në muaj. Nëse kësaj shume do t’i shtonin vlerën e kursyer ose të papaguar nga taksa e banesës, atëherë vlera totale do të ishte 1620 lekë në muaj. Përveç pensionistëve, të përjashtuar nga taksa e banesës janë edhe familjet që trajtohen me ndihmë ekonomike.
FORMULA Baza e llogaritjes së taksës së ndërtesës sipas Ujësjellësit të Tiranës është vlera e “ndërtesës” shumëzuar me shkallën në përqindje të taksës së miratuar me ligj për kategorinë e ndërtesave për banim që është 0.05%”( sipërfaqja x çmim vlerësues lek/ m ² ) x 0.05%). Në tabelë janë edhe çmimet e referencës për kryeqytetin duke iu dhënë mundësinë gjithsecilit të bëjë vetë llogaritë mbi atë që i takon të paguajë në fund të çdo muaji. Nga kjo taksë nuk përjashtohen as bizneset, garazhet apo bodrumet, për të cilat ndryshon vetëm përqindja që do të aplikohet për llogaritjen e taksës, e cila nuk do të jetë 0.05, por 0.02%.
TAKSA Taksa e re e shtëpisë u tha që do të niste të faturohej prej datës 1 janar të këtij viti, por me gjasë, mbledhja e saj do të nisë vitin që vjen. Kjo pasi jo të gjitha drejtoritë e Ujësjellësit kanë marrë angazhimin për llogaritjen e saj. Për Bashkinë e Tiranës, afati i fundit për vetëdeklarimin, pra për dorëzimin e dokumenteve, është data 15 shtator. Brenda kësaj date, qytetarët duhet të dorëzojnë në sportelet e UKT- së kopje të kartës së identitetit, librezën e ujit dhe dokumentin e pronësisë. Pas kësaj, do të nisë edhe faza e verifikimeve në terren, për të saktësuar të dhënat e mbledhura.