Basha: Rama mbron të inkriminuarit, kod heshtjeje si mafiozët
"Me heshtjen e tij, Edi Rama mbron dhe promovon kriminelë e hajdutë dhe i përdor ata për të vjedhur zgjedhjet"
Kryetari i PD, Lulzim Basha, akuzoi dje Kryeministrin Rama se po i qëndron në mbrojtje Agim Kajmakut dhe personave të tjerë të dalë me rekorde kriminale.
Në një postim në "Facebook", Basha i krahasoi veprimet e Ramës me "Omertën", kodin e heshtjes së mafias. "Si në çdo organizatë kriminale, edhe në grupin e strukturuar kriminal të Rilindjes së Edi Ramës vepron kodi i heshtjes, që në zhargonin mafioz njihet si ' omerta'. Omerta për bankomatin personal Dako, omerta për Pjetrin, omerta për Jorgo Kajmakun, omerta për milionat e vjedhur shqiptarëve dhe miliona të tjerë të shpenzuar për luks pushtetarësh, kur shqiptarët zhyten në papunësi dhe varfëri", theksoi kryedemokrati Basha. Në vijim të akuzave të tij, Basha theksoi se Rama po grabit parat e qytetarëve shqiptarë nëpërmjet personave që sipas tij janë me rekorde kriminale. "Me heshtjen e tij, Edi Rama mbron dhe promovon kriminelë dhe hajdutë dhe i përdor ata për të vjedhur zgjedhjet, sepse bashkë me ta pasurohet duke vjedhur shqiptarët dhe pastruar paratë e krimit", tha Basha duke shtuar se zgjidhja është largimi i Ramës nga qeveria. "Por, sa kohë Edi Rama është në zyrën e Kryeministrit, nuk do të ketë as drejtësi dhe as demokraci, as punësim, as mirëqenie, sepse pushtetarët e korruptuar, kriminelët dhe oligarkët do të vjedhin dhe dhunojnë shqiptarët. Hajduti Psikik përbën rrezik për jetën, mirëqenien dhe sigurinë e çdo familjeje. Ai dhe krimi i organizuar janë të pandashëm. Që të shpëtojmë Shqipërinë nga kriminelët me pushtet, duhet të largojmë Edi Ramën", u shpreh Basha. Reagimi i kryetarit të PD- së erdhi pasi prej disa ditësh, opozita ka vendosur në pozitë të vështirë maxhorancën me disa kryetarë bashkie, që, sipas saj janë subjekt i ligjit të dekriminalizimit, ku për njërin prej tyre kjo gjë edhe u faktua.