Balla: “Pjetri” përgjegjësi personale, kërkuam ndjesë
“Do riformatojmë PS e Shkodrës, disa zgjedhje me rezultate të dobëta”
Sekretari i Përgjithshëm në Partinë Socialiste, Taulant Balla, iu përgjigj shqetësimit të kolegut të tij, Ditmir Bushati, duke thënë se rasti Pjetri ishte përgjegjësi personale.
Sipas tij, nuk ka munguar ndjesa publike nga drejtuesit e PS- së për këtë rast drejtuar qytetarëve të Shkodrës. Pas mbledhjes së kryesisë së PS- së, Balla tha se për shkak të rezultateve të ulëta në Shkodër, dega e saj socialiste do të riformatohet. “Rigjenerimi dhe ringritja e strukturave është një proces, që për shkak të zgjedhjeve, do të zhvillohet në të gjitha bashkitë, por me një fokus të veçantë në Shkodër. Në vlerësimin tonë në disa palë zgjedhjesh, rezultatet në Shkodër nuk kanë qenë ato të dëshiruarat për partinë më të madhe në Shqipëri. Për këtë qëllim, kemi marrë një vendim për të pasur një vëmendje të veçantë, qoftë unë si Sekretar i Përgjithshëm, qoftë gjithë Sekretariati. Do të jemi shumë të angazhuar për ta ndjekur me një vëmendje tërësisht të veçantë procesin e riformatimit të Partisë Socialiste Shkodër. Jam shpresëplotë se në Partinë Socialiste të Shkodrës do të ndërtojmë një model konkurrues dhe ofertë, ashtu siç i ka hije Shkodrës loce”, u shpreh Balla pas mbledhjes së kryesisë. DEKRIMINALIZIMI Balla nuk mohoi se në mbledhjen e kryesisë ka pasur diskutime nisur nga këndvështrimi i ndryshëm për fenomenet. “Brenda Partisë Socialiste gjithmonë kemi diskutime, kemi këndvështrime të ndryshme për çështje të caktuara”, tha Balla ndërsa zbardhi dhe diskutimin në kryesi lidhur me ashpërsimin e dënimit ndaj atyre që nuk deklarojnë dënimet e vjetra të personave që hyjnë në politikë. “Nisur për rastin që ju i referoheni, rasti i z. Valdrin Pjetri, i cili u votua nga populli i nderuar i Shkodrës për të qenë kryetar i Bashkisë, për shkak të një përgjegjësie personale nuk u betua për të qenë kryetar i Bashkisë Shkodër, sepse hynte nën juridiksionin e ligjit të dekriminalizimit. Kryeministri ka rishprehur në Kryesi domosdoshmërinë që, përgjegjshmërinë personale të personave, të cilët nuk deklarojnë të shkuarën e tyre, ne ta ashpërsojmë përmes mekanizmave ligjorë. Ligji i dekriminalizimit është një ligj i rëndësishëm. Ne sapo kemi kaluar në Kuvend në muajin qershor ashpërsime të tjera në Kodin Penal. Sa më i fortë ligji, aq më i fortë është zbatimi nga kushdo”, tha Balla. I pyetur se Ditmir Bushati ka kërkuar reflektim për rastin e Shkodrës, Balla u shpreh se PS- ja do të kalojë në veprime konkrete dhe jo në fjalë. “Ajo që po ju them, është se këto nuk bëhen me fjalë, por bëhen përmes mekanizmave për të cilat Kryeministri ka qenë shumë i qartë. Partia Socialiste do të jetë forca motor e reformimit jo vetëm të brendshëm të saj”, tha Balla. Sipas tij, Partia Socialiste u ka kërkuar falje gjithë qytetarëve për përzgjedhjen e kandidatit të Shkodrës. “E para, më lejoni të them se qoftë unë si Sekretar i Përgjithshëm, qoftë kryetari i partisë, që ditën e parë që është vërtetuar mospërputhshmëria e kandidaturës së z. Valdrin Pjetri me pritshmëritë e popullit të nderuar të Shkodrës, ne i kemi kërkuar popullit të Shkodrës ndjesë menjëherë. Megjithatë, ju kujtoj këtu se përgjegjësia është vetëm personale”, u shpreh Balla. Ai akuzoi partinë demokratike se i ka dalë në mbrojtje gjithmonë të zgjedhurve të saj që kishin probleme me drejtësinë. “Ajo që po ju them, është se në çdo rast, Partia Socialiste e Shqipërisë ka vënë një standard në politikën shqiptare: Kurrë nuk jemi bërë mburojë për askënd. Kanë qenë forca të tjera politike që shkonin ushqenin Xhelal Mziun në derë të burgut. Partia Socialiste këtë nuk e ka bërë kurrë dhe nuk ka për ta bërë një gjë të tillë”, tha Balla.