Briselda Kadia: Drejtorët e Shkodrës do japin dorëheqjen
“Do ngrihet një komision qytetar për të përcaktuar zëvendësuesit”
Kryeministri Rama i kërkoi dje të gjithë drejtorëve të institucioneve të Bashkisë së Shkodrës që të japin dorëheqjen. Të gjithë drejtorët kishin mbërritur dje në Tiranë dhe zhvilluan një takim në selinë rozë pak para nisjes së mbledhjes së kryesisë socialiste. Ata janë parë të dalin nga dera e pasme e godinës, të mërzitur e kokulur, duke folur me njëri- tjetrin e duke tymosur cigare, duke treguar në këtë mënyrë edhe klimën e takimit që kishin patur me Kryeministrin Rama. Atyre u është kërkuar që të japin dorëheqjen en bloc, pa zhvilluar më parë një analizë të rezultateve të punës së gjithsecilit. Dy ditë më parë, gjatë takimit që zhvilloi në Shëngjin me drejtuesit e Rajonit të Veriut, Rama kishte kërkuar dorëheqjen e të gjithë drejtorëve të Shkodrës duke i cilësuar “të mbaruar”. Duke folur për performancën e dobët në krye të disa drejtorive të rëndësishme, si Posta, Tatimet, Kadastra, Transporti, Arsimi, Shëndetësia etj., në Qarkun e Shkodrës, Kryeministri Rama ka kërkuar shkarkimin e tyre dhe emërimin në vend të tyre vetëm të zonjave. Burime nga takimi thanë se Rama është shprehur se “gratë janë më të përgjegjshme në detyrë dhe janë më të përkushtuara, ndërsa burrat e kanë mendjen te ryshfetet”, nisur kjo nga informacioni për mitmarrje për një nga këta drejtues. Pas takimit të djeshëm në selinë e PS- së, Kryeministri urdhëroi kryetaren e re të Këshillit bashkiak të Shkodrës, Briselda Kadia, e zgjedhur pak ditë më parë mes debatesh brenda këshilltarëve socialistë, që të komunikojë me mediat, si autoriteti i vetëm i pushtetit në këtë bashki. E emocionuar para kamerave, Kadia u shpreh se drejtorët do të dorëhiqen dhe se ata do të zëvendësohen me gra, ndërsa përzgjedhja e tyre do të bëhet nga komisione qytetare dhe jo nga ministritë nga të cilat varen. “Të gjithë drejtorëve të Bashkisë Shkodër iu komunikua se duhet të japin dorëheqjen, në mënyrë që të kemin një ristartim të të gjithë procesit në këtë bashki. Vendet vakante do të plotësohen nga persona që do jenë brenda këtyre institucioneve. Do ngrihet një komision qytetar për të përcaktuar zëvendësuesit. Prioritet do kenë gratë për të qenë drejtuese të këtyre institucioneve”, u shpreh Kadia para selisë rozë.