Valdrin Pjetri u dorëhoq pas akuzave të PD

Kryebashkiaku i parë socialist i Bashkisë së Shkodrës, Valdrin Pjetri, u dorëhoq dy javë më parë nga marrja e detyrës pas akuzave të Partisë Demokratike se kishte fshehur një dënim të tij në Itali. Përmes një mesazhi në “Facebook”, Pjetri njoftoi se kishte vendosur të hiqte dorë nga posti i kryebashkiakut, për ta përqendruar gjithë vëmendjen dhe energjitë e tij në zgjidhjen dhe sqarimin ligjor të akuzave të opozitës. “Një ngjarje krejt banale e ndodhur në mes të shokëve të mi bashkëstudent, në të cilën unë nuk kam asnjë faj e përgjegjësi e nuk i kisha kushtuar rëndësi, 17 vjet më parë në moshën 20- vjeçare, u nxor nga konteksti dhe rreth saj u ngritën akuza e linçime përtej çdo skrupulli moral e njerëzor. Nuk e kisha menduar kurrë që një ditë do të gjendesha përballë akuzave të tilla. Dhe sado i bindur të jem në pafajësinë ligjore dhe pastërtinë morale të personit tim, me keqardhje ju rrëfej se të tilla shpifje kanë shkaktuar dhimbje të mëdha tek unë e familja ime dhe se unë kurrë nuk kam qenë pjesë e kësaj kategorie, për të cilën sot akuzohem”, shkruan Pjetri.