Meta: Kriza kalon me zgjedhje, 13 tetori është mundësi
"Bundestagu, angazhim të posaçëm për parandalimin e thellimit të krizës politike"
Presidenti i Republikës, Ilir Meta, priti në një takim zëvendëskryetaren e Grupit Parlamentar të CDU/ CSU, deputeten gjermane, Katja Leikert.
Gjatë takimit, kreu i shtetit vlerësoi marrëdhëniet shumë të mira ndërmjet Shqipërisë dhe Gjermanisë, dhe vëmendjen e posaçme që Gjermania po i kushton Shqipërisë, rajonit dhe perspektivës sonë europiane. Krahas kësaj, Meta e falënderoi politikanen gjermane për angazhimin e posaçëm të Bundestagut dhe veçanërisht të Grupit Parlamentar CDU/ CSU për parandalimin e thellimit të krizës politike ku ndodhet vendi, dhe theksoi se nëse do të ishin dëgjuar në kohë sugjerimet dashamirëse të drejtuesve të lartë të CDU, sot gjendja do të ishte krejt e ndryshme. Presidenti Meta ripërsëriti se zgjidhja e vetme e kësaj krize janë zgjedhjet dhe se 13 tetori është një mundësi që nuk duhet humbur, pasi vetëm sa do e përshkallëzonte më tej atë. "Nëse politikanët vendës e kanë të pamundur të mësojnë nga vendet me përvojë të konsoliduar demokratike se si zgjidhen krizat, kanë rastin të mësojnë nga një shtet i ri si Kosova, se si u jepet mundësia qytetarëve të thonë fjalën e tyre përmes zgjedhjeve të parakohshme për të ardhmen e institucioneve qeverisëse", theksoi kreu i shtetit gjatë takimit.
KRIZA Zyrtarja e lartë e CDU/ CSU- së në Bundestagun Gjerman vjen në Tiranë në një kohë kur vendi është në krizën të thellë politike, duke treguar se përplasjet ndërmjet maxhorancës dhe opozitës në Shqipëri nuk kanë rënë në vesh të shurdhët nga ndërkombëtarët. Grupi Parlamentar i CDU/ CSU ka qenë faktori i huaj që ka këmbëngulur edhe më parë për gjetjen e një zgjidhjeje për kapërcimin e krizës politike, por që nuk pati sukses përpara 30 qershorit. Megjithatë, Bashkimi Europian e ka bërë të qartë se nuk ka ndërmend të ndërmarrë rolin e negociatorit për të zgjidhur krizën shqiptare. Bisedimet pritet që të ndodhin pas krijimit të Gjykatës Kushtetuese, institucion i cili pritet që të marrë nën administrim dy çështjet më të nxehta të politikës shqiptare, dekretin e Metës për anulimin e 30 qershorit si datë zgjedhjesh, dhe dekretin tjetër të tij për caktimin e 13 tetorit si datë për zhvillimin e zgjedhjeve lokale, dhe vendimi i maxhorancës për të shkarkuar kreun e shtetit.