“E la pas të shkuarën, u bë familjar i devotshëm”
Të afërmit e ish- policit: Edhe gruaja u largua nga Policia
Santjago Malko, 26vjeçari që u ekzekutua me breshëri automatiku mbrëmjen e së martës në kryeqytet, ka lënë pas bashkëshorten, në një moshë me të dhe dy fëmijë të mitur, njëri prej tyre vetëm 14 muajsh.
I riu nga Lushnja ishte i martuar me ish- efektiven e Njësisë "Shqiponja", Dea Riçku, me origjinë nga Dibra, dhe së bashku kishin dy fëmijë, një vajzë 3 vjeçe dhe djalin 14 muajsh. Çifti ishte njohur dhe dashuruar në Akademinë e Sigurisë, ku kishin kryer në të njëjtën kohë kursin për Patrullë të Përgjithshme. Pas përfundimit të kursit teorik, praktikën e kishin kryer të dy në Policinë e Tiranës. Santjago si punonjës i Patrullës së Përgjithshme, ndërsa Dea si punonjëse e Njësisë së Posaçme "Shqiponja". Por 26- vjeçari Malko kishte qëndruar në këtë detyrë vetëm për 3 muaj dhe më pas ishte tërhequr nga Policia e Shtetit. Ndërsa bashkëshortja e tij qëndroi në Polici edhe për pak kohë pas largimit të tij e më pas edhe ajo dha dorëheqjen. Duket se një nga arsyet pse ajo vendosi ta mbyllte karrierën e saj si police, ishin pikërisht problemet që Santjago pati me drejtësinë në vitin 2016, ku u përfshi në një konflikt me dy vëllezër, vetëm disa metra larg Drejtorisë së Policisë së Tiranës, mbrëmjen e datës 14 prill 2016. Në atë kohë, çifti bashkëjetonte dhe pas largimit nga Policia, krijuan jetën e tyre familjare, duke nisur edhe një biznes privat, me veshmbathje. Në këtë biznes ishin të vetëpunësuar ishpolicja Dea Riçku dhe kunata e saj, motra e Santjagos.
TE AFERMIT Në një prononcim për gazetën "Panorama", familjarët e Deas, e cila tani do duhet të rrisë e vetme dy fëmijët e saj të mitur, tregojnë se Santjago i kishte lënë pas historitë e vjetra dhe i ishte futur rrugës së fesë, duke u bërë një besimtar mysliman i devotshëm. Por njëkohësisht ishte edhe shumë i përkushtuar ndaj familjes së tij, kryesisht ndaj dy fëmijëve të mitur. Të afërmit e tij e quajnë një dramë për një vajzë të re në moshë, e cila mbeti pa krahun e saj të djathtë, bashkëshortin, dhe e vetme të përballojë sakrificat e rritjes së dy fëmijëve të mitur, ku djali është aq i vogël sa nuk arriti as ta njihte mirë të atin, ndërsa vajza do ta mbajë mend gjithnjë fytyrën e tij siç e ka njohur deri dje. "Pasi u njohën në Akademinë e Sigurisë, pas problemeve që kishte Santjago, vendosën të fejoheshin dhe të krijojnë një jetë familjarë. Ngritën një biznes familjar me veshmbathje, ku punonte Dea dhe motra e Santjagos. Edhe Dea vendosi të japë dorëheqjen nga Polica e Shtetit që të impenjohej në biznesin familjar dhe në bashkëjetesën me Santjagon, ku sot kanë një vajzë 3 vjeçe dhe një djalë 14 muajsh, i cili do të rritet pa babanë e tij. Historitë e shkuara, Santjago i la pas duke u bërë një besimtar mysliman i devotshëm dhe familjar i devotshëm për dy fëmijët e tij. Për çdo person që ka fëmijë, i bëjmë thirrje të mos merren me një nënë, e cila do rrisë dy jetimë", shprehen familjarët e Deas dhe Santjagos.